Álvarez asegura que nun va permitir que s’etiqueten como asturianos productos llácteos que nun certifiquen el so orixe

La conseyera de Desarrollu Rural y Recursos Naturales, María Jesús Álvarez, avisó de que nun va dexar que nengún productor use’l nome de ‘Lleche d’Asturies’ pa etiquetar un alimentu que’l so orixe nun seya inequívocamente asturianu. Sicasí, nun apuesta pola creación d’una DOP como demanda Podemos Asturies p’atender a los consumidores que quieran lleche específicamente asturiano.

“Yá lo demostremos apocayá, con dellos recursos presentaos al respeutive d’esti tema y nos que l’Alministración competente en materia de rexistros y marques dio la razón al Principáu al prohibir l’usu de la denominación a delles empreses que queríen facelo ensin l’acreditación de trazabilidá correspondiente”, sorrayó Álvarez nel Plenu de la Xunta Xeneral de güei tres una entruga de Podemos. Cualquier operador pue identificar l’orixe de la lleche nel so etiquetáu de manera voluntaria, siempre que tea sometíu al control correspondiente que lo avale, apuntó.

Amás señaló que dellos productores de lleche asturiano y determinaes industries yá incluyen esa información, polo que’l consumidor “pue tener la seguranza del orixe de la lleche”. El Gobiernu consider que siempre ye posible ameyorar l’etiquetáu d’estos productos, polo que, según confirmó Álvarez, el so departamentu yá instó al Ministeriu d’Agricultura a aprobar un real decretu qu’obligue a incorporar nel etiquetáu la referencia al estáu onde la lleche se cató, procesó y envasó, una midida que yá s’aplica en Francia o n’Italia.

Esta respuesta nun atiende a la demanda de Podemos, yá que l’etiquetáu nun obligaría a especificar el país –esto ye, la lleche asturiano envasaríase como español–, “polo que namái una marca de calidá, la Denominación d’Orixe Protexida, serviría pa identificar l’orixe y atender a la demanda de los consumidores que quieren comprar lleche producida n’Asturies”.