Podemos Asturies plántase énte la llista d'Iglesias, fecha "a deu" dende Madrid

Pablo Iglesias solo inclúi dos asturianos na so llista, ún d'ellos residente en Madrid - Nengún d'ellos foi consensuáu cola organización asturiana - Asturies va impulsar una llista alternativa

La contestación a la llista plantegada por Pablo Iglesias pa les primaries de Podemos, ta espardiéndose per tol estáu, y n'Asturies ta teniendo una de les respuestes más contundentes.

Asturies.com pudo saber qu'amás de Segundo González "Fiz", un asturianu residente en Madrid, güei va anunciase que va haber otra asturiana na llista de Pablo Iglesias, una xixonesa venceyada al mundu de la cultura. Sicasí, nengún de los dos nomes se consultó nin consensuó cola organización n'Asturies, na que la oposición a esti modelu ye practicamente unánime y tresversal a les distintes corrientes y localidaes.

El modelu de primaries, que foi aprobáu nel Conseyu Ciudadanu estatal col votu contrariu del Secretariu Xeneral n'Asturies, Daniel Ripa, plantega una sola llista pa tol estáu, na que los sos miembros "escueyen" la provincia pola que se presenten, en función del númberu de sofitos recibíos. Amás, podrá votase "en plancha", ye dicir a tolos candidatos y candidates d'una llista xuntos.

Esto implica que cualquier llista competidora a la oficialista, tendrá que presentar una candidatura estatal, anque la circunscripción na que va a votar la ciudadanía seya la provincial.

Si esti formatu yá xenero abondes suspicacies, pol so centralismu, ayeri la organización n'Asturies frañó'l silenciu que caltuviere nos últimos díes p'anunciar que diba presentar una llista alternativa.

La situación n'otres comunidaes

Amás d'Asturies, Andalucía, cola so Secretaria Xeneral, Teresa Rodríguez, ye la otra comunidá onde más refugu ta habiendo a un modelu anacrónicu que nun tien en cuenta la capacidá de decisión de los distintos territorios.

Un problema distintu ye'l que Podemos atopa nes comunidaes nes que quier facer candidatures conxuntes con organizaciones propies de los territorios, como Galicia, Valencia, Cataluña o les Baleares, nes que pretende que s'use'l nome Podemos, al que se-y podrían amestar dalgún "apellíu", un modelu qu'organizaciones como les marees gallegues yá refugaron. Nel casu de Més, en Mallorca, considerase qu'esta propuesta ye "ofensiva". En realidá, la propuesta ye facer les primaries y dexar "furacos" nes llistes de Podemos, nes qu'estes organizaciones pudieren enxertar los sos candidatos.

Páxina con recoyida de firmes

Dende la páxina podemosesparticipacion.info hai dellos díes que se tán recoyendo firmes pa pidir otru modelu de primaries. Hasta güei más de 7.000 inscritos en Podemos roblaron el manifiestu, ente ellos 46 cargos de la organización n'Asturies.