Piñán cubre 25 de los 30 puestos de designación llibre del Conseyu Asesor de Política Llingüística

Esti xueves va constituyise’l Conseyu Asesor de Política Llingüística. Amás de los representantes del Gobiernu y d’instituciones como l’Academia de la Llingua Asturiana (ALLA), la Universidá d’Uviéu, el RIDEA y la RTPA, la conseyera Berta Piñán designó a 25 persones de dellos ámbitos pa que participen nel mesmu.

La resolución sobre la composición d’esti órganu afitaba en 30 el máximu de miembros que podría nomar la responsable de Cultura, Política Llingüística y Turismu, polo que queden asina 5 places llibres. Según espliquen dende la conseyería, atendióse a la hora d’escoyer a “criterios de prestíu personal, de paridá y de representación nel organismu de la llingua asturiana y el gallego-asturianu, cola fin de que’l Conseyu Asesor seya plural, representativu y equilibráu”.

Asina, nel sector del ámbitu xurídicu convocóse a Leopoldo Tolivar y José Manuel Pérez; de la filoloxía asturiana, a Xulio Viejo y Taresa F. Lorences; de los coleutivos cívicos de defensa de los derechos llingüísticos, a Iris Díaz Trancho (Reciella), Iván Llera (Iniciativa pol Asturianu), Xosé Candel (Xunta pola Defensa de la Llingua Asturiana) y Xaviel González (Xeira); del de la normalización lingüística, a Fernando Padilla, María Xosé Rodríguez y Penélope Miranda; del lliterariu, a Xuan Bello, Belén Rico, Víctor Suárez, Marta Mori, Consuelo Vega, Mariluz Pontón y Inaciu Iglesias; del periodísticu, a Pilar Rubiera y Cristóbal Ruitiña; y del cultural, a Marga Llano, Pablo Casanueva, María Cotiello, Anabel Santiago y Laura Iglesia. Piñán va ocupar la presidencia del Conseyu Asesor, con Antón García, direutor xeneral de Política Llingüística, como vicepresidente, y Irene Arce, xefa del Serviciu de Normalización de la conseyería, como secretaria.

Van completar esti organismu que tien como oxetu fundamental asesorar al Gobiernu na toma de les decisiones que faigan referencia a los asuntos rellacionaos cola política llingüística de los idiomes propios del país un representante de l’ALLA, de la Universidá d’Uviéu, del Real Instituto de Estudios Asturianos (RIDEA) y de la RTPA.