El Conseyu Asesor de Política Llingüística complétase colos cuatro representantes de les instituciones

Un total de 32 persones van componer el Conseyu Asesor de Política Llingüística que se va constituyir esti xueves telemáticamente. Amás de los 3 miembros de la Conseyería de Cultura, Política Llingüística y Turismu y los 25 designaos pola presidenta del organismu, Berta Piñán, hai que sumar los 4 representantes de l’ALLA, Universidá d'Uviéu, RIDEA y RTPA.

Pola Academia de la Llingua Asturiana (ALLA) va participar nel aconceyamientu de mañana’l so secretariu Xosé Ramón Iglesias Cueva, anque la intención de la institución académica ye que vaya alternando col presidente Xosé Antón González Riaño, según disponibilidá. Mentes, el rector Santiago García Granda va facelo pola Universidá d’Uviéu.

Nel casu del Real Instituto de Estudios Asturianos (RIDEA) va tar presente Marta Pérez Toral, presidenta de la ‘Comisión Primera: Lingüística, literatura y tradiciones’ y direutora del Boletín de Humanidades y Ciencias Sociales. Por último, el direutor xeneral Francisco González Orejas ye’l representante de la Radiotelevisión del Principáu d'Asturies (RTPA) nel organismu que va tener la función d’asesorar al Gobiernu na toma de les decisiones que faigan referencia a los asuntos rellacionaos cola política llingüística de los idiomes propios del país.

Piñán va encargase de presidilu, con Antón García, direutor xeneral de Política Llingüística, como vicepresidente, y Irene Arce, xefa del Serviciu de Normalización de la conseyería, como secretaria. Van competalu los 25 miembros designaos pola conseyera: Leopoldo Tolivar y José Manuel Pérez, del ámbitu xurídicu; Xulio Viejo y Taresa F. Lorences, del de la filoloxía asturiana; Iris Díaz Trancho (Reciella), Iván Llera (Iniciativa pol Asturianu), Xosé Candel (Xunta pola Defensa de la Llingua Asturiana) y Xaviel González (Xeira), del de los coleutivos cívicos de defensa de los derechos llingüísticos; Fernando Padilla, María Xosé Rodríguez y Penélope Miranda, del de la normalización lingüística; Xuan Bello, Belén Rico, Víctor Suárez, Marta Mori, Consuelo Vega, Mariluz Pontón y Inaciu Iglesias, del lliterariu; Pilar Rubiera y Cristóbal Ruitiña, del periodísticu; y Marga Llano, Pablo Casanueva, María Cotiello, Anabel Santiago y Laura Iglesia, del cultural.

Orde del día

Previstu pa les 17 hores, la sesión constitutiva va contar con trés puntos nel orde del día. El primeru ye la presentación del Conseyu Asesor de Política Llingüística, pa siguir col "Reglamentu de réxime de funcionamientu del Conseyu Asesor" y finar con ruegos y entrugues.

Na imaxe, el rector García Granda. Semeya propiedá de la Universidá d'Uviéu.