Piñán anuncia que "nos meses próximos" trabayaráse l'asuntu la especialidá docente

Va presentase nel Ministeriu d'Educación y Formación Profesional la propuesta del Gobiernu "de manera más formalizada".

Berta Piñán, conseyera de Cultura, Política Llingüística y Turismu, afirmó ayeri na so visita a la inauguración de la esposición 'Artistas en la Colección de Arte Banco Sabadell', que se pue visitar hasta'l 19 d'abril na uvieína 'Sala de Exposiciones Sabadell Herrero', que "dende la Conseyería y el Gobiernu asturianu esti tema tenémoslu clarísimu", faciendo referencia tamién a la intervención pela mañana d'Adrián Barbón nel turnu d'entrugues al presidente na sesión del Plenu de la Xunta Xeneral. La especialidá docente d'asturianu y gallego-asturiano "ye un tema pa nós irrenunciable; un tema nel que taremos trabayandos nos meses próximos, y de fechu yá tamos trabayando nél".

La intención de la conseyera ye la de presentar la propuesta del Gobiernu nel ministeriu "d'una manera más formalizada, pero tamién con tola fuercia que tien esta demanda del asturianu, de los docentes y de la propia sociedá". Sobre los plazos, confió "en que nun tardará muncho" n'aprobase la modificación de los reales decretos de Primaria y Secundaria pa incluyir la especialidá.

Na semeya, Pablo Junceda, direutor xeneral del SabadellHerrero; Piñán; y Miquel Molins, direutor de la Fundación Banco Sabadell.