“Esti Gobiernu considera irrenunciable la especialidá docente”, insiste Barbón na Xunta

Adrián Barbón insistió en que’l so Gobiernu “considera irrenunciable” la especialidá docente nel turnu d’entruges al presidente na segunda sesión del Plenu celebrada esti miércoles na Xunta Xeneral. Fíxolo na respuesta al voceru de VOX, Ignacio Blanco, que lu acusaba de nun enfrentase al Executivu estatal.

“Otra cuestión que nos diferencia y que fiximos público, cosa que vusté nun va referenciar nunca porque-y pue dar una especie de reaición alérxica, ye la especialidá docente del asturiuanu ensin necesidá que s’aprueba la oficialidá del asturianu. Esti Gobiernu considéralo irrenunciable. Yá sé que vusté esto considéralo un tema menor”, señaló dirixéndose a Blanco tres citar tamién la cuestión del IVA, afirmando que ta n’estudiu emplegar la vía xudicial, y les alegaciones al estatutu de la industria lletrointensiva.

Asina’l presidente confirma na Xunta Xeneral la posición del so Executivu dada a conocer pola vocera, Melania Álvarez García, tres el Conseyu de Gobiernu últimu pa salir al pasu de la posición amosada un día enantes pola ministra María Isabel Celaá, consistente n’esperar a la declaración de la cooficialidá pa crear la especialidá docente d’asturianu y gallego-asturiano. “Nun ye necesario esperar a la oficialidá p’atender la reivindicación”, apuntó la conseyera, pa depués calificar esta vieya demanda del sector educativu asturianu de “midida irrenunciable”.

Semeya obra d'Armando Álvarez.