Pilar Fidalgo Pravia llee l’entamu de la ‘Riegla de San Benitu’ revisada pola ALLA

Nel mes d’avientu de 2019 presentóse una versión encuriosada de la ‘Riegla de San Benitu’ encargada pol Real Monesteriu de San Pelayu a l’Academia de la Llingua Asturiana. Pilar Fidalgo Pravia (Secretaría Téunica de l'ALLA) encargóse de la revisión xunto con Ana María Cano, y llee nesti videu p’Asturies.com l’entamu de la obra.

La ‘Riegla de San Benitu’ ye un documentu escritu por San Benitu de Norcia, fundador de los benedictinos, que “concreta con procuru la organización de la vida monástica y, ente otres coses, describe les virtúes qu’han de rexir el facer diariu na vida de los monesterios: obediencia, humildá y espíritu de silenciu”, espliquen dambes instituciones. Anguaño, el testu sigue organizando la vida d’estes comunidaes, como Les Pelayes.

El Coleutivu Manuel Fernández de Castro tornóla al asturianu nel 1994, pero la espublización de la Gramática y del Diccionariu de la Llingua Asturiana nos años posteriores convidaben a una revisión del testu p’actualizalu a la norma. A pidimientu de Les Pelayes formóse una comisión de cinco persones –Fidalgo y Cano, per una parte, y la madre abadesa Rosario del Camino Fernández-Miranda , Álvarez y Sor María Covadonga Querol, pela otra– que trabayó per dos años, ente’l 2012 y el 2014, nuna versión que s’asoleyó n’avientu coincidiendo col 25 aniversariu del milenariu de la llegada de les reliquies de San Pelayu, mártir, al monesteriu uvieín.

Nesti videu, Pilar Fidalgo Pravia lléenos l’entamu de la ‘Riegla de San Benitu’ a la puerta del Real Monesteriu de San Pelayu: