Per San Xuan, la sardina mueya’l pan

|
Foguera San Xuan

Cientes de fogueres van prender n’Asturies na medianueche d'esti domingu pa celebrar San Xuan. La nueche más máxica del añu, na que'l fueu y l'agua son protagonistes, ye esperada por toles asturianes y asturianos, que yá engalanen les fontes.

La mayoría de ciudaes y pueblos d'Asturies –al igual que munchos barrios– tienen preparaes pa esta nueche fogueres pa celebrar el solsticiu de branu –realmente foi nel pasu del día 20 al 21, pero la Ilesia católica treslladó esta celebración pagana pa coincidir con San Xuan Bautista– y quemar los augurios malos. Esta tradición de raigaños celtes que recibía’l nome d’Alban Heruin y na que se fai cultu al sol y al agua al traviés del engalanamientu de fontes, ta entovía mui viva nel país.

Amás ye l’únicu momentu d’atopar la flor d’agua, que surde per un instante colos primeros rayos de sol de la mañana según la lleenda, trayendo amor, belleza y salú al que da con ella. Tamién ye la nueche na que les xanes salen de les sos cueves, siendo posible veles nes fontes.

Torna la Nueche Celta de Corvera

En Tresona, la nomada 'Foguera d'Asturies', Fiesta d’Interés Turísticu Autonómicu, recupera la Nueche Celta depués de dellos años nos qu’esta folixa dio un xiru y alloñóse un tantu de la tradición al sumar una orquesta o una fiesta de música electrónica. L-R, enantes de la quema, y José Manuel Tejedor y Dixebra, depués, van poner la música nesta xornada máxica.

L’ambiente en San Xuan en Corvera va comenzar a les 19 hores na zona de Les Palmeres, con xuegos tradicionales pa los más pequeños, col tiru con gomeru como elementu principal, hasta les 21.15 hores. A esa hora va actuar el payasu Tato y, darréu, la Banda Gaites de Corvera d’Asturies enantes del prendíu de la ‘foguerina’, una estructura de dos torres de 2,25 metros d’altor que sostendrán igualmente una imaxe troquelada d’una xana que nesti casu deféndese del abrazu d’un cuélebre, obra d’Alba Caride y Sergio Rodríguez.

A les 22.30 va comenzar la Nueche Celta con L-R, mentes qu’a les 23.30 habrá un pasucais nuevu de la banda gaites acompañando’l ritual teatral a cargu de la compañía Nun Tris, que dará paso a la quema de la foguera de San Xuan. La fiesta allargaráse darréu hasta les 4 de la madrugada coles ‘Miraes’ de José Manuel Tejedor y el rock-folk de Dixebra.

La foguera más multitudinaria de les que s’entamen n’Asturies ye la del Conceyu de Xixón na sablera d’El Natahoyo, que per segundu añu nun va contar con conciertu tres la quema a la medianueche. La celebración principia a les 21 hores col enramáu de la fonte de Pelayo por parte d’Andecha de Cultura Tradicional Na Señardá, anque yá de tarde va haber actuaciones del Grupo Folclórico La Alegría de Porceyo (18 hores, plaza Italia) y la Banda de Música de Xixón (19.30 hores, Campu Valdés), y va siguir na playa coles actuaciones de la Banda Gaites Noega (22.45 hores) y la Banda Gaites Villa de Xixón (23.15 hores).

A la medianueche, tres el prendíu de la foguera, va tener llugar la danza prima y el llanzamientu de fueos artificiales a cargu la empresa valenciana Pirotecnia Ricardo Caballer. Otros barrios de la ciudá, como Ciares o Tremañes, tamién celebren esta nueche máxica nun ambiente más vecinal, mientres qu’en Mareo o Contrueces entámense actuaciones musicales con orquestes.

Mieres, mentes, celebra les sos fiestes de San Xuan, y Uviéu tresllada la foguera a la plaza Porlier, con actuaciones de la bandina Los Gascones y de l’Andecha Folclor d’Uvieu dende les 21 hores y la puesta n’escena del espectáculu ‘Ritual máxicu’ a les 23.15 hores. En L'Entregu, el Centru Social Autoxetionáu La Semiente organiza la foguera del pueblu nel prau xunto al campu de fútbol Nuevo Nalón y l’enramáu de fontes pela mañana (10.30 hores), que completen los conciertos de Latxusma a les 22 hores, y de Bandi-Nè depués de la Danza Prima feminista tres la quema.

Especiales ‘A la gueta los suaños’

Coincidiendo con esta xornada, ponemos a disposición de los nuesos llectores el reportaxe sobre San Xuan pa neños y neñes de la nuesa seición infantil ‘A la gueta los suaños’ con refranes sobre esta fecha máxica. Ésti ayudará a los más pequeños de la casa a comprender meyor les razones d'esta celebración tan prestosa.

Tamién van poder disfrutar del cuentu animáu 'L'encantamientu' que se desendolca en San Xuan.

Contador Estadistiques