Patrimoniu va presentar monumentos asturianos énte la UNESCO

El Conseyu de Patrimoniu Históricu Español aconceyó esta mañana n'Uviéu, onde aceptó la documentación de la candidatura del Arte Paleolíticu del Cantábricu para que s'enxerte nel catálogu del Patrimoniu Universal de la Humanidá de la UNESCO.

El preste d'esti importante organismu ye un emburrión importante pa la candidatura qu'axunta a los yacimientos más importantes d'arte rupestre d'Asturies, Cantabria y Euskadi, sobremanera dempués de les declaraciones de la Ministra de Cultura Carmen Calvo, que visitare esti branu la Cueva del Pozu'l Ramu nes Arriondes, onde reconoció que la declaración por parte de la UNESCO diba ser dificil en cuantes qu'España yá ye ún de los estaos que tien más llugares rellacionaos cola prehistoria reconocíos pola UNESCO, anque no tocante a la costa cantábrica, namás la Cueva d'Altamira tien esi reconocimientu. 39 yacimientos asturianos entren na candidatura conxunta astur-cantabro-euskalduna, siendo los más importantes d'ellos el del mesmu Pozu'l Ramu, la cueva d'El Pindal, Candamu y Llonín.

El Conseyu de Patrimoniu Históricu Español tamién aceptó l'espediente que se-y presentó pa que la ilesia prerrománica de San Salvador de Valdediós, en Villaviciosa, entre dientro del llistáu del Patrimoniu de la Humanidá de la UNESCO, igualándose asina colos trés monumentos prerrománicos d'Uviéu (Santuyanu, Santa Maria del Naranco y San Xuan de Lliño) que son Patrimoniu de la Humanidá dende 1985.

El procesu pol que van mandase los espedientes del paleolíticu y del "conventín" de Valdedios entra asina nuna fase nueva na que van tener que desarrollase hasta xunu del añu qu'entra, cuando'l Conseyu de Patrimoniu Históricu Español decida si los lleva definitivamente hasta instancies de la UNESCO.