“Paezme mui bona cosa que los diputaos y diputaes faigan usu de les llingües d’Asturies”, apunta Piñán

La conseyera de Cultura, Política Llingüística y Turismu, Berta Piñán, calificó de “surrealista” la esfriega vivida’l miércoles na Xunta Xeneral pola intervención del popular Álvaro Queipo en gallego-asturiano, dalgo que recibió de forma positiva. “Paezme mui bona cosa que los diputaos y diputaes faigan usu de les llingües d’Asturies”, aseguró.

“Paez ser qu’ente ellos mesmos tuvieron un conflictu nesi momentu”, apuntó Piñán, que dixo siguir la situación “dende la mio posición d’observadora completa”. Sicasí, la conseyera queda “cola defensa del usu del gallego-asturiano nes instituciones”.

“Paezme mui bona cosa que los representantes na Xunta, y los diputaos y diputaes, faiga usu de les llingües d’Asturies, y una de les llingües d’Asturies ye’l gallego-asturiano”, añadió la escritora. Piñán fixo este declaraciones esta mañana na inauguración de la esposición ‘Creadores de conciencia. 40 fotógrafos comprometidos’ nel Muséu Barjola nel marcu de la XVI ‘Encuentros Fotográficos de Gijón’.