Mallada diz que Queipo usó’l gallego-asturiano na Xunta Xeneral “p’amosar qu’en cada conceyu se fala d’una manera”

La vocera del PP, Teresa Mallada, quixo dexar ver esti xueves que la intervención d’Álvaro Queipo en gallego-asturiano na Xunta Xeneral yera estudiada. Según declaró un día depués de que se-y torgara l’usu de la so llingua materna al so compañeru, la intención del PP yera “amosar qu’en cada conceyu se fala d’una manera”.

La salida de la popular pa esplicar qu’un diputáu del so grupu parllamentariu emplegara una de les dos llingües non oficiales d’Asturies, cuando’l mesmu PP tien torgáu nesta mesma llexislatura a la conseyera Berta Piñán intervenir n’asturianu, ye que too yera una maniobra premeditada. “El mio compañero Álvaro Queipo comenzó ayeri la so intervención falando ‘en fala asturiana’ p’amosar que na nuesa comunidá autónoma, práuticamente en cada conceyu, se fala d’una manera”, declaró esta mañana, p’añadir depués que’l PP tien la postura nidia: “sí a la defensa de les tradiciones, non a les imposiciones”.

Mi compañero @AlvaroQueipo comenzó ayer su intervención hablando en fala asturiana para demostrar que en nuestra comunidad autónoma, prácticamente en cada municipio, se habla de una manera.
Nuestra postura es clara:
Sí a la defensa de las tradiciones,
no a las imposiciones. pic.twitter.com/33BMk2YdWc

— Teresa Mallada De Castro (@TereMalladaPP) November 28, 2019

Mientres, Queipo señaló ayeri tar “enormemente feliz y arguyosu del votu unánime que güei se produxo na Xunta Xeneral del Principáu d’Asturies” pa “consiguir que l’Instituto Geográfico Nacional termine lo enantes posible col tratu discriminatoriu hacia’l topónimu ‘Ría del Eo’, elevando’l so estatus al mesmu nivel que tiene anguaño’l de ‘Ría de Ribadeo’”. Sobre la torga que vivió por usar el gallego-asturiano pola protesta de VOX, teniendo que comenzar de nuevo la so intervención en castellanu, apuntó que “tripes aparte, que ye como hai que tomar les coses, toi tremendamente feliz de que güei Asturies comprendiera la enorme complexidá y variedá llingüística que tenemos nesta rexón y que munchos, nos sos plantegamientos simplicistes, nieguen p’adaptar la realidá a los sos intereses políticos. Siempre defendí y defenderé l’usu y la promoción de les nueses llingües, como diz la Llei y l’Estatutu d’Autonomía; formen parte de la nuesa cultura, les nueses tradiciones y la nuesa historia viva. Siempre ensin imposiciones y con normalidá: como somos los asturianos”.