Paco Fernández dimite al frente del Caudal tres empatar col Izarra

|
Paco Fernández dimite al frente del Caudal tres empatar col Izarra

El téunicu cumplió cola so pallabra y dexa'l bancu del Hermanos Antuña tres nun poder derrotar al conxuntu navarru (1-1).

Un fallu defensivu al borde del descansu condenó ayeri al Caudal nel partíu contra l'Izarra. El gol inicial del central Catú, nel minutu 24, confirmaba la bona salida de los mierenses, con un 'once' con dellos cambios nel que destacaba la presencia del xuvenil Davo, mui activu en tol partíu.

Col partíu controláu, y cuando paecía que los llocales diben llegar al descansu con ventaya, Arnau aprovechó un mal pase atrás de Borja Prieto pa plantase frente a la portería de Rabanillo, énte una defensa que quedó parada, y superar al porteru con un disparu rasu axustáu al palu. Yera'l minutu 42 y suponía un golpe duru a la moral d'un equipu que venía d'enganchar siete derrotes siguíes.

Sicasí, el Caudal nun-y quitó la cara al partíu y tuvo tola segunda parte buscando'l gol del trunfu con más corazón que cabeza, anque les ocasiones de gol más nidies foron pal Izarra. Al final empate y adiós de Fernández, que tres el xiblíu del árbitru dirixóse a la grada con xestos de perdón y despidida, a lo que l'afición respondió con aplausos.

D'esta forma, el téunicu uviedín cumplió cola anuncia fecha esta selmana d'abandonar el bancu de nun superar al Izarra. El Caudal, penúltimu con 10 puntos, a 7 del Izarra que marca la permanencia, y a 4 del Osasuna B, en puestu de promoción, busca agora sustitutu pa Fernández, pa lo que suena con fuercia Josu Uribe.

El Lealtad tamién sigue en descensu

Un puestu perriba del Caudal, pero con 3 puntos más, ta'l Lealtad, que'l sábadu nun pudo superar al colista, el Peña Sport, en Les Caleyes (1-1). Los navarros adelantáronse nel minutu 40 por mediación de Fermín Úriz y los llocales sólo pudieron empatar por mediación de Montero, nel 56.

Tampoco algamó un bon resultáu'l Sporting B, que perdió col Tudelano por 1-0 por mor d'un penalti polémicu que tresformó Víctor Bravo nel minutu 61. Pese a la derrota, los de José Alberto siguen en puestos de promoción d'ascensu: terceros con 30 puntos, a 6 del líder, el Mirandés, y con 6 de ventaya col quintu, el propiu Tudelano.

 Na semeya, Fernández sigue dende'l bancu un llanzamientu de córner del Izarra.

 

Contador Estadistiques