Paco Álvarez gana’l XXII Concursu de Cuentos pola Oficialidá del Asturianu

Gallardón nuevu pa Francisco ‘Paco’ Álvarez nel Concursu de Cuentos pola Oficialidá del Asturianu. El periodista y escritor, que presenta esti xueves en La Pola Siero’l so llibru últimu, ‘Pasaxeres de la nueche’ (Hoja de Lata), repite victoria nesti premiu entamáu pol Conceyu de Bimenes col rellatu entituláu ‘Rosa d’iviernu’.

Dieciocho histories presentáronse nesta edición, decidiéndose’l xuráu formáu polos escritores Xulio Vixil Castañón, Héctor Pérez Iglesias y Pablo Rodríguez Medina, l’alcalde Aitor García Corte, que fixo la función de presidente, y Daniel Cueli, de secretariu, pola firmada por Álvarez. El xixonés, que yá ganara nel 2016 con 'El fotógrafu de la lluna', lleva una recompensa de 600 euros, que va recibir nel actu d’entrega de gallardones, nuna fecha entá por confirmar.

El segundu premiu, valoráu en 450 euros, foi pa Xaime Martínez por ‘La nieve nun ye blanco y el cuervu nun ye prietu’. Mentes, el merecedor del terceru, con 300 euros de remuneración, resultó Xuan Trenor con ‘Cavilaciones d’un home enroldáu’.

Llibru de rellatos curtios

Álvarez va tar esta tarde (20 hores) en La Pola Siero, n’El Caricós Chigre Cultural, pa presentar el so llibru nuevu, ‘Pasaxeres de la nueche’. Trátase d’un llibru de rellatos curtios históricos que lleven al llector a delles époques y situaciones.