El Concursu de Cuentos pola Oficialidá de Bimenes algama la so ventena segunda edición

|
Casa Conceyu de Bimenes

El plazu pa presentar creaciones, una por persona, fina'l miércoles 31 de xunetu.

El Conceyu de Bimenes sigue apostando pol so Concursu de Cuentos pola Oficialidá del Asturianu, calteniendo los premios a pesar de nun contar con nengún sofitu económicu esternu dende'l 2013. Éstos son de 600 euros pal ganador, de 450 pal segundu premiu, y de 300 pal terceru.

Les bases de la ventena segunda edición del certame lliterariu son les mesmes que n'años anteriores. Tolos rellatos que se presenten al premiu –ún por persona– han de ser inéditos y deben tar redautaos en llingua asturiana, respetando les normes ortográfiques vixentes.

Éstos nun deben esceder les diez fueyes, mecanografiaes a doble espaciu per una cara. Los participantes han de presentar un orixinal del cuentu, trés copies del mesmu y otra más en CD, too ello baxo un nomatu que debe apaecer nuna plica con tolos datos personales y con un currículu con semeya.

Los rellatos han de presentase, enantes del 31 de xunetu –fecha del matasellu de correos– nun sobre al Ayuntamientu de Bimenes (pal XXII Concursu de Cuentos pola Oficialidá del Asturianu), na direición Plaza de Miranda de l Douro, s/n, códigu postal 33527 de Martimporra.

Un xuráu formáu por trés persones cualificaes y presidíu pol alcalde de Bimenes, Aitor García Corte, va decidir el ganador del concursu, en fecha entovía por confirmar, al igual que l'actu institucional d'entrega de premios.

Pérez Iglesias, ganador nel 2018

La edición pasada del Concursu de Cuentos pola Oficialidá del Asturianu llevóla Héctor Pérez Iglesias, con ‘Que trata de lo que me cuntó’l mio mayestru al dexar l’abadía’. Yera la segunda ocasión na que resultaba ganador, tres el so ésitu nel 2012 con 'Puertes abiertes'.

El segundu puestu foi pa ‘Enkidu y la eternidá’, de Rubén Magadán, y el terceru pa ‘Nun requexu’, d’Armando Gutiérrez Rodríguez.

Contador Estadistiques