#OficialidáChallenge: el retu que va entamar la Pita de la Xunta

La Pita de la Xunta pola Defensa de la Llingua Asturiana (XDLA) ta nestos momentos decidiendo qué trés persones destacaes de la sociedá asturiana va escoyer pa entamar el #OficialidáChallenge. Esti retu, que pretende convertise viral, tien como oxetivu amosar apoyu a la manifestación de Xixón convocada pal 6 d’abril.

El #OficialidáChallenge consiste en que los usuarios xuban a les redes sociales vídeos curtios animando a la participación na marcha, amosando’l so ciñu pola llingua o diciendo la so palabra favorita n'asturianu o en gallego-asturiano. Darréu ha de nominar a otres trés persones pa siguir la cadena.

El retu va comenzar cola nominación de la Pita, anque nun habrá qu’esperar a que te llegue pa ponete col #OficialidáChallenge. Nel momentu nel que l’icónicu personaxe del movimientu de reivindicación llingüística abra’l mesmu, persones de dientro y fuera d’Asturies van poder xubir los sos vídeos en redes sociales xunto cola etiqueta #OficialidáChallenge.

Imaxes pa perfiles

Pa visibilizar entovía más el compromisu cola oficialidá y cola marcha del 6 d'abril en Xixón baxo’l lema ‘L’asturianu llingua oficial ¡agora!’ con salida a les 18 hores de L’Humedal, la XDLA pon a disposición de toos cuatro modelos de semeyes de perfil pa les redes sociales: dos n'asturianu y dos en gallego-asturiano, de color azul, colos lemes 'Yo voi' o 'Eu vou' y 'Ye agora' o 'É agora', qu'inclúin la fecha y hora de la manifestación.

Éstos van poder usase como imaxe de WhatsApp o de los perfiles personales de Twitter, Facebook o cualesquier rede social y, asina, enllenar les redes de color azul pa mostrar el ciñu pol nuesu patrimoniu llingüísticu.