“Nun ye momentu d’aguantar la respiración, tenemos que reivindicar los derechos llingüísticos y la oficialidá”, asegura Pulgar

|
Cartelu manifestación ‘L’asturianu llingua oficial ¡agora!’ 6-A 2019

La XDLA, un añu depués de la histórica convocatoria d’Uviéu, torna a convocar una manifiestación baxo’l mesmu lema: ‘L’asturianu llingua oficial ¡agora!’. “Nun ye momentu d’aguantar la respiración, tenemos que reivindicar los derechos llingüísticos y la oficialidá” asegura’l so voceru nacional Carlos Pulgar sobre la cita que va tener llugar en Xixón el 6 d’abril con salida a les 18 hores de L'Humedal.

Al rodiu de 30.000 persones, según les cifres daes pola Xunta pola Defensa de la Llingua Asturiana (XDLA), salieron a la cai’l pasáu 21 d’abril n’Uviéu pa reclamar la oficialidá del asturianu y del gallego-asturianos. Esti 6 d’abril, coles eleiciones Nacionales a les puertes (26 de mayu), a les que’l vienres se sumaron les Estatales (28 d’abril), el coleutivu pretende entamar otra demostración de fuercia na defensa de los derechos de los falantes d’estes dos llingües propies del país.

“Tamos nun momentu importante dende dos puntos de vista: la situación que vive’l movimientu de reivindicación llingüística y el desendolcu del cursu políticu, con eleiciones estatales y asturianes nel horizonte. Nun ye momentu d’aguantar la respiración, tenemos que reivindicar, como llevamos faciendo dende hai 40 años, los derechos llingüísticos de tolos asturianos y la oficialidá”, apunta Pulgar.

Descentralización

Xixón, plaza que yá acoyó la histórica manifestación del 22 de xunu del 1976 baxo’l lema ‘Autonomía rexonal. Bable nes escueles’ convocada por Conceyu Bable y una marcha pol Día de les Lletres Asturianes, toma’l relevu d’Uviéu. “Tres facer un conceyu n’Uviéu y otru en Xixón, y depués de falar con delles asociaciones y coleutivos, vimos un ambiente propiciu pa facer la convocatoria en Xixón”, esplica Pulgar.

“Llevamos meses trabayando nesta cita”, añade’l voceru nacional, que va tener como novedá un programa descentralizáu d’actividaes previes de toda triba que se van entamar hasta’l 6-A. “Pretendemos asina incoporar a asociaciones de diferente calter favoratibles al movimientu de reivindicación llingüísticu que nun participen nél. Ellos ganen en visibilidá y la reivindicación llega a muncha más xente”, rellata.

La demanda de la oficialidá, poro, va tener presencia en múltiples eventos culturales, recreatives, musicales, gastronómiques o deportives nel mes y mediu próximu.

Contador Estadistiques