Ocho coleutivos van lleer un manifiestu nel Congresu que reclama los mesmos derechos que'l castellanu pa toles llingües

|
Iniciativa pol Asturianu y PSOE Congresu y Senáu en Madrid

La Plataforma Igualdá Llingüística, na que participa Iniciativa pol Asturianu, va lleer esti martes nun actu nel Congresu un manifiestu que reclama los mesmos derechos y deberes del castellanu pa toles llingües del Estáu, asina como la oficialidá pa les que nun la tengan. El coleutivu, qu’aconceyó esti llunes con dellos representantes del PSOE, va vese tamién con otros diputaos asturianos en Madrid.

‘Pluralidá llingüística: llibertá, igualdá y democracia’ ye’l nome del manifiestu que roblen ocho coleutivos y na que demanden que “les llingües propies distintes del castellán tienen de gociar de los mesmos drechos y deberes que se reconocen al castellán”, ente los que tán “el deber de conocencia, ensin el qu’esiste una desigualdá manifiesta, como llingües oficiales, no que cinca al castellán, que sí gocia d’esti deber”. Ente los seis puntos del mesmu rescampla tamién el que se refier a que “fai falta impulsar y sofitar reformes estatutaries pa la oficialidá de les llingües propies qu’entá nun son oficiales nuna parte o la totalidá del territoriu onde se falen”.

Representantes de les asociaciones firmantes, esto ye, Iniciativa pol Asturianu, Acció Cultural del País Valencià, Plataforma per la Llengua, Òmnium, A Mesa pola Normalización Lingüística, l’aragonesa Nogará, Kontseilua y el Centre Internacional Escarré per a les Minories Ètniques i Nacionals (Ciemen), van tar xunto con diputaos de dellos partíos nun actu pa la prensa previstu pa mañana a les 11 hores. Nel mesmu va lleese’l manifiestu completu.

Delles xuntes previstes

Iván Llera, presidente d’Iniciativa pol Asturianu, desplazóse a Madrid pa participar nel actu, tando acompañáu por Inaciu Galán y Xuan Pandiella. Aprovechando’l viaxe, contautó con dellos grupos políticos cola fin de celebrar xuntes pa falar sobre l’idioma.

La primera tuvo llugar esta mañana con miembros del PSOE. Nella tuvieron presentes Roberto García Morís y les senadores María Jesús Álvarez González, María Fernández Álvarez y María Mercedes Otero, amás del parllamentariu gallego Guillermo Meijón, que s’ocupa de cuestiones llingüístiques dientro del grupu socialista.

“Vimos bona disposición en tolo que-yos tresmitimos”, apunta Llera, que cita la especialidá docente y la creación d’una partida presupuestaria pa l’Academia de la Llingua Asturiana, al igual que tienen el restu d’academies, como los puntos principales a tratar. “Tomaron nota de too y vieron les nueses reivindicaciones de bona manera, con posibilidá de solución”, añade.

Los diputaos de Foro y PP, Isidro Martínez Oblanca y Paloma Gázquez, de manera respeutiva, tresmitieron a Iniciativa pol Asturianu la so disposición d’aconceyar mañana, pendiente de la so axenda. Mesma respuesta dio Sofía Fernández Castañón, de Xuníes Podemos, anque ta confirmada la presencia de representantes del partíu nel actu de llectura del manifiestu.

Na semeya, Galán, Llera y Pandiella, por Iniciativa pol Asturianu, xunto con Meijón, Álvarez González, García Moría, Fernández Álvarez y Otero.

Contador Estadistiques