Éstos son los temes qu'Iniciativa pol Asturianu trató colos diputaos asturianos

|
Inaciu Galán, Isidro Martínez Oblanca, Iván Llera y Xuan Pandiella nel Congresu

Representantes del coleutivu aconceyaron nel Congresu con tolos partíos menos con VOX.

La delegación d'Iniciativa pol Asturianu, conformada pol presidente Iván Llera, Inaciu Galán y Xuan Pandiella, desplazóse a Madrid pa participar ayeri nel actu de presentación del manifiestu ‘Pluralidá llingüística: llibertá, igualdá y democracia’, robláu tamién por Acció Cultural del País Valencià, Plataforma per la Llengua, Òmnium, A Mesa pola Normalización Lingüística, l’aragonesa Nogará, Kontseilua y el Centre Internacional Escarré per a les Minories Ètniques i Nacionals (Ciemen) como miembros de la Plataforma Igualdá Llingüística. El documentu encamienta al Gobiernu nuevu de coalición a tomar midíes necesaries nesta recién estrenada llexislatura pa garantizar la diversidá llingüística, la llibertá y la igualdá.

Llera aprovechó la so intervención énte la prensa madrilana y dellos diputaos pa denunciar la situación del profesoráu d’asturianu, en situación d’interinidá y precariedá pola falta de la especialidá docente, recordando que "ésta ye una situación inxusta y que tien una solución fácil, que ye la modificación del decretu d’especialidaes", y reivindicó la oficialidá de les llingües que nun lo son nel Estáu, casu del asturianu y l'aragonés, amás d'otres que sí lo son nos sos territorios pero non n'otros onde se falen. Tamién denunció “l’incumplimientu de la toponimia per parte del Estáu nes carreteres asturianes. El Gobiernu d’España nun se puede escudar na falta d’oficialidá pal usu de los nomes que son oficiales según los decretos correspondientes”.

Los representantes d'Iniciativa pol Asturianu aprovecharon la presencia nel Congresu p'aconceyar el llunes col diputáu Roberto García Morís y les senadores María Jesús Álvarez González, María Fernández Álvarez y María Mercedes Otero, amás del parllamentariu gallego Guillermo Meijón, que s’ocupa de cuestiones llingüístiques dientro del grupu socialista. Ayeri, mentes, entrevistáronse colos congresistes Sofía Fernández Castañón (Xuníes Podemos), Isidro Martínez Oblanca (Foro) y Paloma Gázquez (PP), mentes que José María Figaredo (VOX) nun respondió al pidimientu del coleutivu.

De toos algamaron compromisos pa la creación de la especialidá docente de Llingua Asturiana y Gallego-asturiano, un tema que previsiblemente va tratase nel conceyu de la conseyera d'Educación, Carmen Suárez Suárez, d'esta tarde en Madrid cola ministra d'Educación y Formación Profesional, Isabel Celaá, dientru de la serie de reuniones que ta calteniendo con responsables autonómicos, y pa la creación d'una partida nos Presupuestos Xenerales del Estáu pa pa l’Academia de la Llingua Asturiana, al igual que tienen el restu d'academies. Les otres demandes, amás del emplegu de la toponimia oficial "nes carreteres estatales, en RENFE y l’aeropuertu" foron "programación en llingua asturiana en RTVE y RNE y una presencia real del multillingüismu en TVE; presencia del asturianu en páxines web institucionales; propuesta d’añadir l’apartáu de llingües protexíes estatutariamente, amás de les oficiales, a los Premios Nacionales, ayudes y otres convocatories; la posibilidá del establecimientu del DNI billingüe; y, de cara’l futuru, la creación d’un departamentu del Gobiernu pa politica llingüística como una Secretaría d’Estáu de Política Llingüística".

Na semeya, Galán, el diputáu Martínez Oblanca, Llera y Pandiella.

Contador Estadistiques