'O idioma é a vida' ye'l lema de la manifestación de Santiago de Compostela pol Día das Letras Galegas

El martes, 17 de mayu, celébrase'l Día das Letras Galegas, que nesta ocasión ta dedicáu al autor Manuel María. La plataforma Queremos Galego convoca pa esta xornada un gran manifestación na capital del país vecín baxo'l lema 'O idioma é a vida', garráu d'un versu del escritor d'Outeiro de Rei.

Queremos Galego agrupa a más de 600 coleutivos sociales de dellos ámbitos que nació "de la voluntá d'articular una respuesta coleutiva ampliar a favor de la llingua propia del nuesu pueblu, el gallegu; de defensa y afirmación de los usos públicos y derechos llingüísticos yá garantizaos pola llexislación actual; de normalización progresives naquellos espacios u'l nuesu idioma nun goza entovía de presencia deseada", apunten na so páxina web. La organización, como ye vezu nel Día das Letras Galegas, convoca pa esti martes a tola sociedá gallega pa participar nuna marcha en Santiago de Compostela que va axuntar a miles de persones “amosando, una vegada más, que la inmensa mayoría del pueblu gallegu quier a la so llingua y aiciones polítques reales pa rehabilitala en tolos espacios", afirmó Marcos Maceira, voceru de Queremos Galego y presidente d'A Mesa pola Normalización Lingüísitica.

El decretazu contra'l gallegu d'Alberto Nuñez Feijóo, qu'otorga un mayor pasu al castellanu na escuela, va siguir siendo ún de los exes de protesta de la manifestación. “El Gobiernu de Feijóo tien la responsabilidá de velar polos intereses de Galiza; el qu'ataca a la llingua de Galiza, ataca los intereses de Galiza, la vida de Galiza, y la so capacidá pa desenvolverse de manera plena. La llingua propia xune y fortalez. Feijóo tien un compromisu llegal pa cola lingua, y tamién moral como presidente de la Xunta”, señaló Maceira.

Otra manera, Queremos Galego va festexar tamién nesta xoranda reivindicativa, con salida a les 12 hores de l'Alameda y final na Praza da Quintana de Compostela, onde van desendolcase dellos eventos, los cien años del nacimientu de les Irmandades da Fala, considerada la primer organización de defensa del gallegu.