Miles de persones manifestáronse en Santiago de Compostela pa defender el gallegu

Esti martes celebróse'l Día das Letras Galegas. Queremos Galego entamó una marcha pela capital del país.

Nella participaron representantes de tolos partíos de la oposición na Xunta. Precisamente, ún de los oxetivos de la marcha, entamada baxo'l lema 'O idioma é a vida', yera protestar contra'l decretazu contra'l gallegu impulsáu pol popular Alberto Nuñez Feijóo, qu'otorga un mayor pasu al castellanu na escuela.

Tres un percorríu peles cais de Santiago, la manifestación finó na Alameda, onde Marcos Maceira, voceru de Queremos Galego y presidente d'A Mesa pola Normalización Lingüísitica, lleó un comunicáu. Nél demandó'l derechu a poder vivir en gallegu y afirmó que la probitú económica, social y cultural va venceyada con aquellos pueblos qu'esclúin la llingua propia. D'igual forma esixó'l cumplimientu de les 400 midíes del Plan de Normalización da Lingua Galega.

A nivel institucional, nesti Día das Letras Galegas homenaxóse a Manuel María, autor nacíu n'Outeiro de Rei.