“Nun voi soportar más postures supremacistes”, retruca Elipe a Fernández Huerga

|
Xune Elipe

Xune Elipe, de Somos Avilés, retrucó al edil Luis Ramón Fernández Huerga que “nun voi soportar más postures supremacistes” tres les pallabres del socialista nel Plenu del mes pasáu. El conceyal d’Urbanismu y Planificación dexó cayer que’l de Villalegre tenía una enfermedá por falar asturianu y la so concepción d’Asturies.

“Me quedo con una parte muy buena d’esto, y es el viaje a Bruselas: ya lo decía Jovellanos, el nacionalismo es una enfermedad que se quita viajando. Me alegro mucho”, dixera Fernández Huerga’l mes pasáu, lo que motivió una respuesta d’Elipe y una intervención de l’alcaldesa Mariví Monteserín qu’indignó entovía más al edil de Somos Avilés, qu’abandonó la sala. Ayeri, cuando cuando se debatía una moción sobre la contaminación, Elipe aprovechó pa unviar unes pallabres a Fernández Huerga sobre dichu socesu: “La crítica como conceyal hacia’l so llabor ye entendible y esperable; mesmamente’l tonu faltó ye asumible”, comenzó, pa depués recordar axetivos que recibió’l so grupu municipal nesta llexislatura como “indocumentados, ensin nada de rigor, oportunistes, alarmistes, populistes…”.

“Una cosa ye metese con daquién”, siguió, “pola so xera como conceyal, y otra cosa distinta dicir directamente ensin venir a cuentu y ensin que tenga nada que ver colo que se trata, qu’una persona tien una enfermedá por falar n’asturianu y tener una concepción d’Asturies determinada, tan llexítima como la que pueda tener cualquier otru de los que tán equí sentaos o sentaes. Nel fondu lo qu’hai detrás d’eses pallabres que nel anterior Plenu se dirixeron a esti conceyal, ye creese con una superioridá moral o intelectual”, afirmó, momentu nel qu’Elipe foi cortáu pola alcaldesa Mariví Monteserín. Pa finar, el de Villalegre aseguró aceptar les disculpes posteriores del socialista, pero non "más postures supremacistes”.

Contador Estadistiques