"Nun vimos entovía una tendencia de disminución" nes hospitalizaciones, calca Fernández Muñiz

El conseyeru de Salú comunica que los téunicos nun prevén "un crecimientu descontroláu" de la incidencia.

Pablo Ignacio Fernández Muñiz compareció esta mañana na Xunta Xeneral na Comisión de Salú pa informar de la situación de la pandemia de COVID-19. "Tamos nuna sitación con pequeños dientes de sierra, según los díes", apuntó pa después insistir con que "n'Asturies nun vimos entovía una tendencia de disminución d'estos indicadores, sinón más bien al contrariu: siguimos con un aumentu progresivu, leve, non mui altu, d'estos indicadores asistenciales".

Una situación que llevó a Asturies a defender que la mázcara nun dexara de ser obligatoria n'espacios d'interior enantes de la Selmana Santa, anque añadió que "sí ye cierto que los indicadores de tresmisión, agora tamos midiendo la incidencia acumulada en persones mayores de 60 años a 7 díes y 14 díes, na selmana última tienen una tendencia a la disminución leve". Nesi sen, rescampló que "nun significa qu'esto pasara, sinón que tamos nuna situación con dientes de sierra a la que tenemos que tar mui atentos".

D'igual forma señaló que los téunicos nun prevén "un crecimientu descontroláu o esplosivu como vimos n'otres ondes epidémiques, lo que nun quier dicir que nun nos preocupe". "Nun debemos engañanos, la pandemia nun finó", rescampló Fernández Muñiz, que pidió cautela nes feches festives próximes.

168 pacientes

L'actualización última de la Conseyería de Salú, fecha na tarde del vienres con datos correspondientes hasta'l miércoles, asitiaben el total d'hospitalizaos en 168, 4 menos que'l domingu. D'ellos 156 tán en planta y 12 na UCI.

Asturies sigue en situación d'alerta baxa por COVID-19. Tolos indicadores tán nesi nivel depués de que xubiera la tasa d'hospitalizaciones nueves na UCI por cada 100.000 habitantes en 7 díes, mientres que se caltién en 'circulación controlada la ocupación de cames UCI.

Otra manera, ente'l llunes y el domingu hebo que llamentar la muerte de 12 persones con edaes comprendíes ente los 48 y los 101 años.