Los hospitalizaos con COVID-19 son 172

El país sigue en riesgu baxu colos indicadores nuevos de la pandemia afitaos el 28 de marzu.

Dende esa fecha mírense los que determinen el nivel d'usu de los servicios asistenciales pa determinar el riesgu, en concreto seis: ocupación de cames por pacientes COVID-19, la tasa d'hospitalizaciones nueves por cada 100.000 habitantes en 7 díes, la tasa d'ocupación hospitalaria cada 100.000 habitantes, la ocupación de cames UCI, la tasa d'hospitalizaciones nueves na UCI por cada 100.000 habitantes en 7 díes y la tasa d'ocupación UCI cada 100.000 habitantes. Los trés primeros y l'últimu tán agora en nivel baxu, esto ye'l segundu de los cinco niveles, mentes que los dos restantes asítiense no que se llama 'circulación controlada'.

El domingu, últimu día de los que la Conseyería de Salú dio datos, había n'Asturies 172 hospitalizaos, de los que 161 tán en planta y 11 na UCI. Ye una cantidá superarior a la d'hai trés selmanes: el 10 de marzu había 137 (118 y 19, de manera respeutiva).

La vixilancia del coronavirus SARS-COV-2 céntrase agora n'ámbitos y grupos vulnerables, esto ye, los mayores de 60 años, les inmunodeprimíes y les muyeres qu'esperen un críu, asina como los casos graves. Otra manera, ente'l xueves y el domingu hebo que llamentar la muerte de 7 persones d'edaes ente los 48 y 97 años.