"Nun son bonos datos relativos a les fiestes del 24 y 25", avisa l'Observatoriu de Salú tres 129 contaxos

El martes hai que llamentar 2 muertes.

L'Observatoriu de Salú n'Asturies, venceyáu a la la Direición Xeneral de Salú Pública, avisó tres adelantar los datos de la COVID-19 que "entovía ye pronto pa sacar conclusiones, pero nun son bonos datos relativos a les fiestes del 24-25 –agora tenemos la foto fixa d'hai 5-7 díes–". Ayeri detectáronse 129 casos nuevos –3 más nes cifres oficiales–, 59 más que'l llunes.

Fixéronse 3.375 pruebes de diagnósticu d'infeición activa, polo que la tasa de positividá foi del 4,56 por cientu. A siete díes, el porcentaxe ye de 3,17.

"Nun ye l'añu pa celebrar Nuechevieya. La situación de los díes próximos será clave. Prescindamos de lo prescindible", encamienta l'Observatoriu de Salú n'Asturies.

2 muyeres

Na xornada finaron 2 muyeres de 91 y 59 años cola enfermedá causada pol coronavirus SARS-CoV-2, de la qu'una yera residente nun centru de mayores. Dende qu'entamó l'andanciu yá s'acumulen 1.343 muertes.

205 persones tán hospitalizaes con confirmación o sospecha de COVID-19, 19 menos que'l llunes, mentes que na UCI hai otres 64, lo que significa un ingresáu más.

18 biltos activos

Asturies informó al Ministeriu de Sanidá de la esistencia de 18 biltos activos, 7 menos qu'hai una selmana, que sumen un total de 310 casos. 5 d'ellos detectáronse estos 7 díes últimos, comunica Salú.