“Nun se puede siguir con una esceicionalidá constitucional de non oficialidá de más de 40 años”, afirma Riaño

La situación actual de non oficialidá ye “en términos sociales y democráticos, inceptable”, denunció Xosé Antón González Riaño, presidente de l’Academia de la Llingua Asturiana (ALLA), nel so discursu nel actu institucional pol XLIV Día de les Lletres Asturianes. El Teatru Campoamor presentó una bona entrada nun eventu que contó cola asistencia de los candidatos de la FSA, PP, Podemos y Foro.

El gaiteru ganador del últimu Trophéee Mac Crimmon del Festival Interceltique de Lorient, Fernando Vázquez Cárcaba, encargóse d’abrilu con una pieza musical, pa depués dar pasu a la entrada de los académicos pela puerta central del patiu de butacas pa percorrer el pasiellu y acceder al escenariu. Xunto a ellos, Lourdes Álvarez y David Guardado, protagonistes de la tarde: la de La Güeria d’Urbiés recoyía’l III Premiu Nacional de Lliteratura Asturiana y el xixonés yera recibíu como académicu de númberu nuevu.

Sonia Avellaneda y Próspero Morán repitieron como conductores d’un actu que, llueu de les intervenciones d’Álvarez y Guardado, siguió col discursu institucional de González Riaño. Depués de agradecer “la presencia d’esta gran representación social, política y ciudadana”, calificó como “fundamental sentir que compartimos l’enfotu nuna Asturies culturalmente más bayurosa, democrática y proyeutada hacia’l futuru” y centróse na gallardonada y nel académicu nuevu.

Sobre Álvarez apuntó que “el premiu lléga-y, arriendes d’ello, nel cumal del so maurecer como poeta, como persona y como creadora d’un escenariu poéticu-lliterariu que, como escribí apocaya, ‘fuxe, conscientemente, de lo real y evidente pa buscar agospiu nel intimismu de la muyer, nel simbolismu de lo personal y na astraición d’unes imáxenes qu’ufren al llector la posibilidá d’una interpretación plural y suxetiva. Esto ye, tamos énte la lliteratura con mayúscules...’.

“La de so”, siguió, “ye una lliteratura escrita, sí, nuna llingua minorizada, pero tamién nuna llingua vivida, sentida y estudiada con procuru pola autora. El compromisu de Lourdes ye, entós, doble: hacia la so particular conceición estético-lliteraria y hacia la propia ferramienta de trabayu, esto ye, hacia l’asturianu y les posibilidaes del caltenimientu como llingua de cultura”.

Nes pallabres dedicaes a Guardado definió al filólogu como “un home qu’axunta un gran valir y esperiencia personal en fasteres tan estremaes como’l papel de les nueves teunoloxíes y los medios de comunicación, l’estudiu sobre procesos d’estandarización y normalización de les llingües o, en fin, la conocencia de los aspeutos socio-hestóricos de configuración de les llingües nel contestu español”, ensin escaecer “el so papel anovador y vanguardista dende’l puntu de vista musical y el so protagonismu intelectual nel surdimientu del fenómenu social que representó’l Xixón Sound”.

No que respeuta a la que va ser la so contribución a l’ALLA citó l’ayuda “a la nuesa proyeición institucional al traviés de les nueves teunoloxíes, proponiendo nueves llendes y estayes de normalización” y la investigación y publicación de “les condiciones nes que la llingua d’Asturies apuerta hasta’l sieglu XXI”.

La mayor y meyor opción histórica pa reconocer los derechos llingúísticos

Llueu de repasar el llabor académicu del añu, momentu nel qu’emplegó’l gallego-asturiano a la hora de falar del Diccionario Normativo del Eonaviego (DEN), agora n’ellaboración, González Riaño centróse na función de la institución de tutelar los derechos llingüísticos d’asturianes y asturianos y les eleiciones del 28-M. “En 2022 perdióse la mayor y meyor opción histórica de facer vidable n’Asturies l’espíritu y la lletra del artículu 3.2 de la Constitución Española. Ye preciso reconocelo pa deprender de los erroes y pa pescudar que la falta de xenerosidá, de sentíu políticu y de compromisu con Asturies nun han repetise, nun pueden volver repetise...”, principió.

El presidente de l’ALLA recordó que “agora, en 2023, vamos tener, otra vuelta, una nueva oportunidá” y fixo un pidimientu a los partíos: “Asturies nun puede siguir con una esceicionalidá constitucional de non oficialidá que dura yá más de 40 años. Eso ye, en términos sociales y democráticos, inaceptable”.

Darréu naguó “por un consensu políticu ampliu del que formen parte fundamental les fuerces de centruderecha; esto ye, aquelles opciones moderaes, europeístes y constitucionalistes… Y pensamos qu’eso pue llograse atendiendo a un bien social y cultural p’Asturies, difícilmente discutible, que tien, dende llueu, un calter tresversal y qu’asitia percima de les lexítimes diferencies partidaries.

Pa finar, calcó en que “tenemos, otra vuelta, la oportunidá que nun supimos remanar con procuru en 2022. Esta vegada nun podemos fallar a Asturies. Los asturianos y asturianes decidimos el 28 de mayu y la clas política tien la responsabilidá d’alministrar los resultao en bien de la llingua y la cultrua d’Asturies. En bien d’Asturies”.

L’actu institucional siguió con una llectura de poemes d’Álvarez por parte d’Avellaneda y Morán, y cola actuación musical de Silvia Quedada. La cantante, acompañada al tecláu por Alfredo González y a la viola por Cristina Gestido, interpretó dellos cantares como ‘Vida que te falta’, ‘La pena abierta’ o ‘El candil’.

Peslló l’eventu, que televisión en direuto TPA, Vázquez Cárcaba cola interpretación del himnu nacional.

Amplia representación política y social

Como vien siendo habitual, l’actu pol Día de les Lletres Asturianes contó con una amplia representación política y social. Dexáronse ver cuatro candidatos: el socalista Adrián Barbón, presidente d’Asturies que se presenta a la reeleición, que tuvo acompañada pola conseyera de Cultura, Política Llingüística y Turismu, Berta Piñán, con Ana Cárcaba, conseyera de Facienda, y Antón García, direutor xeneral de Política Llingüística, nel palcu d’al llau; el popular Diego Canga xunto al secretariu xeneral Álvaro Queipo, que colaron depués de la intervención de González Riaño al tener qu’acudir a otru eventu; Cova Tomé, de Podemos, con Xune Elipe, númberu de la llista, y l’ex diputáu Andrés Fernández Vilanova ‘Ron’; y Adrián Pumares, de Foro, xunto a Inaciu Iglesias y Carlos Suárez, opción del partíu pa l’Alcaldía d’Uviéu, y José Suárez Arias-Cachero ‘Felechosa’, númberu 3.

Nun acudió Ovidio Zapico, el cabeza de llista de Convocatoria por Asturies (IX-Más País-IAS), tando la coalición representada por Nuria Rodríguez, númberu 4 de la llista, y Gaspar Llamazares, candidatu d’Uviéu. El coordinador autonómicu interín de Podemos, Rafael Palacios, pela so parte, asitióse n’otru palcu xunto con Ana Taboada, númberu 4 de la lista, y les opciones pa les alcaldíes de Xixón y Uviéu, Olaya Suárez y la independiente Belén Suárez Prieto.

Tamién acudieron dellos direutores xenerales y los diputaos socalistes Mónica Ronderos García y José Ramón Fernández Castro, y el de Podemos Daniel Ripa. No que respeuta a los alcaldes, acudieron los de Miranda, Cabranes, Colunga, Mieres y Casu, amás de Cecilia Pérez, primer edil d’El Franco y presidenta de la Federación Asturiana de Conceyos.

Otra manera, en representación de la Mesa Nacional d’Aína asistió Iyán González. No que respeuta a sindicatos, rescampló l’asistencia de Pepe Álvarez, secretariu xeneral d’UXT, xunto con Javier Fernández Lanero, responsable n’Asturies, amás del de Comisiones Obreres (CC OO) d’Asturies, José Manuel Zapico; el coordinador d’USO n’Asturies, Miguel Rivero; Irene Orviz, de CSI; y Xosé Lluis Colodrón y Nacio González, de SUATEA.

L’amplia llista d’asistentes complétase col rector Ignacio Villaverde, representantes de coleutivos de defensa de les llingües d’Asturies, numberosos escritores, músicos y xente de la cultura.