Asturies.com ufre'l discursu institucional completu de González Riaño nel Campoamor

Con motivu del actu de l'Academia de la Llingua Asturiana nel XLIV Día de les Lletres Asturianes.

5 de mayu de 2023

XLIV Día de les Lletres Asturianes

Xosé Antón González Riaño

Señor Presidente del Principáu y Señores Conseyeros, Sr. Rector de la Universidá d’Uviéu, autoridaes, representantes sindicales y culturales, amigues y amigos de l’Academia, amigues y amigos d’Asturies.

Quixere agradecer, en primer llugar y fondamente, la presencia d’esta gran representación social, política y ciudadana nesti 44 Día de les Lletres Asturianes. Pa l’Academia y, lo que ye más importante, pa la llingua que nos axunta como asturianos y asturianes, ye fundamental sentir que compartimos l’enfotu nuna Asturies culturalmente más bayurosa, democrática y proyeutada hacia’l futuru. Munches gracies pola vuesa llealtá y el vuesu encontu.

El Premiu Nacional de Lliteratura Asturiana y el nuevu académicu de númberu de la institución

Güei, xornada na que festexamos les lletres asturianes, ye un día especialmente importante porque acabamos d’entregar el III Premiu Nacional de Lliteratura Asturiana a la trayectoria creativa d’una escritora esceicional: Lourdes Álvarez García. Lourdes ye, como se recueye nel acta del xuráu que venimos de sentir, una autora que destaca “pola calidá d'una obra poética dafechu singular, desarrollada ensin priesa, percima de modes y corrientes, que crea un mundu lliterariu orixinal y propiu”.

El premiu lléga-y, arriendes d’ello, nel cumal del so maurecer como poeta, como persona y como creadora d’un escenariu poético-lliterariu que, como escribí apocayá, “fuxe, conscientemente, de lo real y evidente pa buscar agospiu nel intimismu de la muyer, nel simbolismu de lo personal y na astraición d’unes imáxenes qu’ufren al llector la posibilidá d’una interpretación plural y suxetiva. Esto ye, tamos énte la LLITERATURA con mayúscules...”

La de so ye una lliteratura escrita, sí, nuna llingua minorizada, pero tamién nuna llingua vivida, sentida y estudiada con procuru pola autora. El compromisu de Lourdes ye, entós, doble: hacia la so particular conceición estético-lliteraria y hacia la propia ferramienta de trabayu, esto ye, hacia l’asturianu y les sos posibilidaes de caltenimientu como llingua de cultura.

Al da-y la norabona a Lourdes Álvarez facémoslo na creyencia de que, magar el Premiu tien como finxu la valoración de toa una trayeutoria lliteraria, tamos énte una autora que va siguir apurriéndonos, munchu tiempu, lo meyor del so llabor poéticu y creativu. Munches gracies, Lourdes, por facenos sentir, nos tos poemes, la emoción y el valir de la gran lliteratura.

Pero la importancia pa l’Academia del día de güei vese tamién afitada pol fechu d’acoyer ente nós a un nuevu miembru de númberu de la institución: el filólogu David Guardado Diez. Guardado ye, dende llueu, un home qu’axunta un gran valir y esperiencia personal en fasteres tan estremaes como’l papel de les nueves teunoloxíes y los medios de comunicación, l’estudiu sobre los procesos d’estandarización y normalización de les llingües o, en fin, la conocencia de los aspeutos socio-hestóricos de configuración de les llingües nel contestu español. Tampoco nun escaecemos el so papel anovador y vanguardista dende’l puntu de vista musical y el so protagonismu intelectual nel surdimientu del fenómenu social que representó’l Xixón Sound. En cualquier casu, tou esti llabor failu’l nuevu académicu dende una perspeutiva asturiana y aplicada con procuru a entender la nuesa realidá llingüística y cultural.

La so principal contribución a l’Academia ha ser, xustamente, nesi sen; ye dicir, ayudando a la nuesa proyeición institucional al traviés de les nueves teunoloxíes, proponiendo nueves llendes y estayes de normalización y, a lo cabero, investigando y espublizando les condiciones nes que la llingua d’Asturies apuerta hasta’l sieglu XXI.

David, esperamos que t’afayes ente nós y que puedas llevar alantre una xera tan importante.

Una normalidá recuperada y un añu de llabor académicu granible

L’Academia de la Llingua Asturiana, n’otru sen, recuperó nel añu caberu la so dinámica normal nel terrén de la investigación, de la normativización y de la tutela de los derechos llingüísticos de la ciudadanía asturiana.

Dalgunes de les nueses actuaciones nos ámbitos conseñaos podríen resumise falando, por exemplu, del estudiu de la conocencia real del asturianu nos noyos urbanos d’Uviéu, Xixón y Avilés, del que yá se fexo, nel so momentu, un avance de conclusiones. Ye esta una investigación pola que naguábemos cuantayá y que tresllada unos resultaos que ruempen la vieya zuna de considerar que l’asturianu yera la llingua conocida y remanada namái nos contestos rurales, aisllaos o allonxaos de l’Asturies central.

Les aplicaciones práutiques del estudiu, a lo cabero, dexen la posibilidá d’afondar nuna política llingüística muncho más decidida y afayada a la realidá sociollingüística de les fasteres urbanes de la Comunidá.

Por outro llao, el noso llabor académico afondóu en trabayos tan relevantes como a ellaboración, en marcha dafeito, del DEN (Diccionario Normativo del Eonaviego), ferramenta normalizadora fundamental pral mantenemento da fala eonaviega y un verdadeiro proyecto estratéxico pr’Asturias dende a perspectiva cultural. El DALLA (Diccionariu de la Llingua Asturiana) tamén ta sendo renovao, pouco a pouco, na súa edición dixital y ofrecendo a os sous usuarios un modelo llingüístico cada vez miyor adaptao ás necesidades comunicativas d’hoi. En fin, el Centro TermAst de nova terminoloxía en asturiano siguíu publicando propostas normativas en ámbitos concretos da nosa realidá social, científica y cultural.

A Academia tamén recuperóu a convocatoria de concursos abertos y a súa resolución en estaxas tan importantes como a investigación toponímica, el léxico, a lliteratura tradicional ou as fontes orales da llingua.

En cuantes a la tutela de los derechos llingüísticos, a lo llargo del añu caberu la institución caltuvo aconceyamientos y conversaciones con organizaciones sindicales, colos grupos parllamentarios allugaos na Xunta Xeneral y, lóxicamente,

col Gobiernu del Principáu. A toos ellos se-yos treslladó les nueses propuestes no que ser refier a la política llingüística que, camentamos, Asturies necesita, asina como les idees básiques de cómo entenderíemos la co-oficialidá del asturianu y del eonaviegu.

La coxuntura política, les eleiciones autonómiques y les nueves oportunidaes pa la llingua

En rellación, xustamente, cola oficialidá, en 2022 perdióse la mayor y meyor opción histórica de facer vidable n’Asturies l’espíritu y la lletra del artículu 3.2 de la Constitución Española. Ye preciso reconocelo pa deprender de los errores y pa pescudar que la falta de xenerosidá, de sentíu políticu y de compromisu con Asturies nun han repetise, nun pueden volver repetise...

Porque agora, en 2023, vamos tener, otra vuelta, una nueva oportunidá. N’efeutu, malpenes en venti díes n’Asturies habrá eleiciones autónomiques. Que naide espere que l’Academia oriente’l votu de la ciudadanía. Nun podría facelo pola so necesaria neutralidá institucional y porque ente nós tán representaes toles sensibilidaes polítiques democrátiques. Sicasí, l’Academia persabe que la xente asturiano va decidir el sen del so votu en función de les estremaes ufiertes eleutorales n’ámbitos tan importantes como la economía, la igualdá, l’emplegu, les comunicaciones o la mocedá..., pero tamién teniendo en cuenta les propuestes en llingua y cultura. Y equí nós sí nos atrevemos a facer un pidimientu a los partíos y coaliciones qu’opten a tener representación nel parllamentu asturianu: Asturies nun puede siguir con una esceicionalidá constitucional de non oficilidá que dura yá más de 40 años. Eso ye, en términos sociales y democráticos, inaceptable.

Facer cumplir la previsión constitucional nesti terrén nun habría ser tan difícil na toma de determín políticu: ye lo que llogró, cuantayá, la ciudadanía gallega, vasca, navarra, catalana, aranesa, valenciana y balear; ye dicir, un ámbitu territorial qu’axunta cuasimente al 50 por cientu de la población española.

Dacuando, ente los sectores sociales más concienciaos, fálase de, los yá “célebres”, 27 diputaos necesarios p’asitiar la oficialidá nel Estatutu d’Autonomía. Pero, ¿por qué vamos conformanos con 27 y nun vamos enfotanos en llograr munchos más? Na Academia, en rellación cola oficialidá, naguamos por un consensu políticu ampliu del que formen parte fundamental les fuerces de centruderecha; esto ye, aquelles opciones moderaes, europeístes y constitucionalistes... Y pensamos qu’eso puede llograse atendiendo a un bien social y cultural p’Asturies, difícilmente discutible, que tien, dende llueu, un calter tresversal y que s’asitia percima de les lexítimes diferencies partidaries.

Arriendes d’ello, dende l’Academia tamién tenemos en cuenta que, en cuantes llegue la oficialidá, esta va ser xestionada, tanto a nivel autonómicu como na vida de los conceyos, por opciones polítiques d’estremáu calter y toes elles tienen que sentir l’arguyu de ser protagonistes de lo que tien que ser un procesu modélicu y compartíu na so aplicación.

Amigos y amigues, equí tenemos, otra vuelta, la oportunidá que nun supimos remanar con procuru en 2022. Esta vegada nun podemos fallar a Asturies. Los asturianos y asturianes decidimos el 28 de mayu y la clas política tien la responsabilidá d’alministrar los resultaos en bien de la llingua y la cultura d’Asturies, en bien d’Asturies...

Amigues y amigos, fino yá les mios pallabres y fáigolo col enfotu de que dientro d’un añu, cuando tornemos a venos equí, puédamos facelo sabiendo que la llingua y la cultura d’Asturies empobinen pel camín de la so dignificación y normalidá; esto ye, de la llibertá llingüística que namái la oficialidá afita.

Muitas gracias. Munches gracies.

Feliz Día das Lletras Asturianas;
Feliz Día de les Lletres Asturianes

Teatru Campoamor
Uviéu, 5 de mayu de 2023