“Nun doi por fecha la prórroga presupuestaria”, afirma Javier Fernández

El presidente Javier Fernández caltién esperanza en sacar alantre les cuentes del 2017 pese al pesimismu de la patronal, que yá cuenta con una segunda prórroga presupuestaria. “Nun la doi por fecha”, aseguró’l socialista nun parón de la tercer sesión del Alderique d'Orientación Política Xeneral.

“Yá conocen el rumbu que plantega’l Gobiernu en rellación a los presupuestos pa facer qu’una mayoría política posible qu’esiste de 28 diputaos se convierta tamién nuna mayoría parllamentaria que permita l’aprobación de los presupuestos”, en referencia a los escaños que suma’l grupu socialista, el de Podemos y el d’Izquierda Xunida (IX). “Ye verdá que nun ta fácil, pero interaremos facelo, amás de la manera más rápida porque esto convién concretalo y non dilatalo de manera indefinida”, añadió’l presidente del país.

Un optimismu l’amosáu por Javier Fernández que nun comparte’l presidente de la Federación Asturiana de Empresarios (FADE), Pedro Luis Fernández Pérez, qu’afirmó que cree “que va haber una prórroga” tres sentir les intervenciones de les dos primeres sesiones del Alderique d'Orientación Política Xeneral. El líder de la patronal llamenta la falta de diálogu ente los partíos y califica de “mala noticia” p’Asturies la falta d’una “previsión económica pa gobernar”.

Tercer sesión

Dende esta mañana ta celebrándose la tercer sesión d’esti debate sobre l’estáu del país, na que los diferentes grupos políticos tán presentando 146 iniciatives al Gobiernu que se voten na Xunta Xeneral. Ente elles, destacó l’apoyu del PSOE a una propuesta de Ciudadanos de llevar les escueles de 0 a 3 años a aquellos conceyos onde haya demanda.