El PP ufre un alcuerdu presupuestariu a Fernández, qu’insiste en mirar a la izquierda

Mercedes Fernández, vocera del PP, ufrió un alcuerdu presupuestariu al presidente Javier Fernández a cambiu de modificar l’impuestu de sucesiones y tuvo tiempu p’atacar al idioma. El líder socialista, que repitió un enfrentamientu nuevu con Podemos, insiste en buscar alcuerdos con esta formación y IX.

L'Alderique d'Orientación Política Xeneral vive la so segunda xornada cola intervención de los voceros de los diferentes grupos parllamentarios. La mirada taba puesta na intervención d’Emilio León, el de Podemos, depués de los ataques nel discursu d’ayeri de Javier Fernández a la so formación y dambos políticos dexaron nidies les sos discrepancies.

León destacó la contradicción del socialista pa buscar un pautu d’izquierdes n’Asturies y favorecer en Madrid la investidura de Mariano Rajoy, una astención “gratis” que calificó de vergoña. Tamién acusó al PSOE de tar secuestraos pol PP y apuntó que l’alcuerdu cola FSA ye “difícil, pero non imposible”. Na so respuesta, Javier Fernández acusó a Podemos d’echar basura contra’l so partíu, anque finalmente afondó la so disponibilidá en negociar tanto la fiscalidá como los presupuestos.

Pela so parte, Mercedes Fernández ufrió al líder socialista un alcuerdu presupuestariu, “porque me resisto a creer que tea cómodu na prórroga” si retira l’impuestu de sucesiones. “Los asturianos tán siendo discriminaos d’una manera intolerable, porque por una herencia de 200.000 euros paguen 22.000 euros; 282, en Madrid; 212, en Cantabria y 0 euros en Galicia”, apuntó.

Na so intervención, la vocera popular criticó la xestión del presidente y afirmó que “el socialismu asturianu ta nun evidente fin de ciclu, y tien que ser asina porque depués de 30 años ta secu d’idees; agotó la paciencia y la ilusión de los asturianos y nun pue siguir hipotecando les oportunidaes de la nuesa tierra”. D’igual forma, tamién tuvo un recuerdu pal asturianu, acusando al conseyeru Genaro Alonso na so parte del discursu dedicáu a la Educación de tar “cola llingua y poco más”.

Javier Fernández, na réplica, amosó sorpesa pola diposición de Mercedes Fernández d’aprobar el presupuestu “ensin miralu”, cuando l’añu pasáu lu refugó “ensin miralu tampoco”, y nun dio sensación de querer esplorar esta vía. Mentes, en Twitter llegó a espublizar que “si Podemos quier zarrar la puerta al presupuestu, que lo diga nidio. Yo quiero aprobalu con IX y Podemos”.

Si Podemos quiere cerrar la puerta al Presupuesto, que lo diga claramente. Yo quiero aprobarlo con IU y Podemos #DebateAsturias pic.twitter.com/UtBm0PeAdz

— Javier Fernández (@javier_asturias) 8 de noviembre de 2016