Nuevu númberu de la revista de Belenos

La revista "Asturies, Memoria Encesa d'un
País" qu'edita la Fundación Belenos, presentó na
sé del Club Prensa Asturiana (C/Calvo Sotelo - Uviéu) el
númberu 15 d'esta que ye, dende 1995, la referencia na
divulgación de la etnografía, historia y cultura asturianes.
Asturies.com faló esta mañana con Astur Paredes, miembru de la
Fundación Belenos y ún de los responsables de la revista,
p'adelanta-yos a los nuestros llectores los conteníos d'esti nuevu númberu.

L'artículu col qu'entama esti númberu de Belenos ta dedicáu al estudiu sobre los afayos paleolíticos nel macizu d'Ardines, nel oriente asturianu. Rodrigo Balbín Behrmann, Miguel A. González Pereira y J. Alcolea, qu'apurren datos sobre pintures desconocíes hasta agora, adelanten nesti artículu una interesante teoría que busca una interrellación ente tolos yacimientos de la fastera, una zona enforma bayurosa en güelgues del paleolíticu, con cueves como la de Tito Bustillo o La Lloseta.

Pela so parte, Susana P. Molina firma l'artículu "Los adornos áureos nel Institutu de Valencia de Don Juan" en que fai un repás a dellos adornos y amuletos d'época astur de los que yá se tenía noticia por semeyes de la Comisión Nacional de Monumentos de 1868 y qu'equí ponénse agora en rellación con otres pieces de la parte del mediterráneu y de centroeuropa.

Emma González nel artículu entituláu "Semeya d'una desconocida" fai un reflexón sobre la estela de la Dóriga, datada en fecha allegada al sieglu I. L'autora espeya na revista la relevancia social de la persona a la que se-y dedica esta estela, de marcáu calter indíxena.

"Memoria gráfica" una de les secciones fixes de la revista, dedícase nesti númberu a amosar el trabayu de Gausón Fernande, quien lleva una bona temporada atropando semeyes de gaiteros de los años 60 y 70 nos conceyos d'Ayer, Mieres y L.lena. El resultáu d'esti trabayu de recuperación demuestra que, contra lo que se piensa xeneralmente, la gaita, nos años anteriores a la renovación del instrumentu que se dio nos 80, entovía yera protagonista de la vida social cotidiana.

Dos de los artículos d'esti "Asturies" traten sobre temes d'historia contemporánea. En primer lluga, la profesora d'arte maria del Mar Díaz fai un estudiu sobre les llitografíes de les conserves de pescaos y cárnicos n'asturies. Esti trabayu, fechu a partir de los archivos de la imprenta Moré, da p'anécdotes curioses como l'apaición d'etiquetes n'inglés empobinaes pal mercáu d'esportación, qu'espoxigó nos años 60 por culpa de que les prebes nucleares emporcaron el bon nome de la conserva que venía d'otros mares, mientres que les del cantábricu ganaron presencia en mercaos internacionales. otramiente, José Valdeón fai un estudiu sobre l'arte de la xardinería nes casones d'indianos nel que se demuestra como los xardinos llegaben dacuando a tener tanta importancia como la mesma casa.

Daniel García de la Cuesta, conocíu por ser a lo llargo de munchos años el vigulinista del grupu Lliberdón, fai l'artículu "La farpa, un instrumentu escaecíu" nel qu'investiga sobre la documentación más antiguo qu'esiste sobre l'arpa. De la Cuesta aporta abondante material documental y afonda nuna llinia que lu lleva a descubrir que les fontes más antigües, como'l "llibru d'Aleixandre" del sieglu XIII, apauten pal instrumentu una grafía con "F" que ye desconocía anguaño.