Niundes presenta "Enxamás ye pa siempres", el so primer discu

Foi un camín bien llargu, pero yá ta equí'l primer
discu d'esti grupu que tien el so ñeru nel oriente d'Asturies, y que
quier pegar fuerte na escena folk asturiana. "Enxamás ye pa
siempres" sal a la cai de la mano de la discográfica
Lloria Discos, dirixida pol que
tamién foi productor del discu, el guitarrista de Llan de Cubel Xel
Pereda.



Niundes ye un grupu que
ñaz en 2001 de la xuntura de músicos de Llanes. Los más
d'ellos yeren alumnos de la Escuela de Música tradicional Llacín,
y cono pasa davezu, el contactu y deprendizaxe na escuela foi llevando a un
grupu de rapazos a tocar xuntos, pa, primero de nada, disfrutar cola
música que diben deprendiendo. Pasín ente pasu la xuntura de
músicos foi garrando traza de grupu y actuen per primer vegada nes
fiestes de Porrúa en Xunetu de 2001. Dende ehí'l grupu entama a
facer conciertos perdayuri, un procesu nel que diba ferviendo'l so estilu, pa
qu'a la fin los directos meyoraren cola incorporación de componentes
nuevos a la banda, zarrándose la formación en 2003 cuando
s'incorpora al grupu Isidro Suárez, el que fuere xiblateru de
Felpeyu.



Niundes entró nel estudiu de grabación per primer vegada en xunu
de 2002, pa grabar trés temes pa ún CD entituláu
"Nuevu
folk asturianu volume IV", compartíu con otros cuatro grupos
nuevos y espublizáu por discos L'Aguañaz. Más tarde, en
2003, son seleccionaos pa un programa del Taller de Músicos de
Xixón, que consistía nuna beca que pagaba la grabación
d'una maqueta nun estudiu profesional. Nesa maqueta entama la so
collaboración col músicu y productor Xel Pereda, que
caltién n'actualidá.



Dempués de tou esti camín, el grupu decide que yá ye'l
momentu de ponese a grabar el que tien que ser el so primer discu en solitariu.
Esti primer trabayu yá ye una realidá con "Enxamás ye
pa siempres", onde se pueden sentir 11 temes perfectamente coherentes colo
que ye l'estilu del grupu, ensin separase muncho de lo que yá entamaron
a amosar naquel discu de "Nuevu folk asturianu volume IV". Les
comparances son odioses, pero davezu suelen esclariar idegues, asina que
l'estilu Niundes podemos asitialu cerca d'otros grupos como Corquiéu o
Llan de Cubel. Empaste melódicu y sonoru de la gaita de Roberto
Tárano, el vigulín de Ramón González y la xiblata
travesera d'Isidro Suárez. A esti capital melódicu emburrialu
rítmica y armónicamente una guitarra con acompañamientu de
grupu folk clásicu de la mano de Jonathan Ward, y un bodhram a l'altura
d'Omar Ceballos. Nel grupu rescampla la presencia de la cantante Belén
Díaz que pon en voz a cinco temes del discu que tienen lletra de Xe Mel
Sánchez. Otra caraterística qu'hai que comentar d'esti cd y del
grupu ye que tiren pola composición y se topen mui poques pieces
tradicionales.



El grupu contó cola collaboración d'un par de músicos pa
rematar el conceptu sonoru d'esti "Enxamás ye pa siempres",
casualmente los dos de Llan de Cubel. El bouzouky de los cubelos Elías
García toco en cinco pieces, mientres que Xel Pereda, productor
tamién del discu, grabó tamién bouzouky nun par de
cantares y banjo n'otru.



Pa sentir tolo que quier furnir al folk asturianu ye bona idega mercar el cd,
cosa que yá se pue facer na nuestra tienda de productos asturianos
n'internet.