Nin tanto nin dello: l'espolín ente Foro y Mulet vistu dende l'asturianismu

Falamos con Xuan Xosé Sánchez Vicente y Ignaciu Llope sobre l'espolín ente Carles Mulet y senadores de Foro y PP. Sánchez Vicente y Llope critiquen el plantegamientu centralista de Foro al facer la propuesta, anque'l primeru rescampla tamién que lo que dixo'l senador valencianu foi "una babayada"

Too asocedió’l miércoles, nel Plenu del Senáu, tres presentar Rosa María Domínguez de Posada una moción con un claru posu covandonguista  pa la emisión d’una moneda de 2 euros y trés sellos conmemorativos del triple centenariu de Cuadonga. “El XIII centenariu del Reinu d'Asturies conmemora' principiu de lo qu'anguaño ye'l Reinu d'España, fechu d'importancia histórica internacional”, ye una de les frases qu’apaecen na esplicación de la propuesta.

Compromís foi ún de los partíos que presentó una enmienda a la moción, en concreto una de sustitución solicitando una emisión filatélica “en idioma asturiano”. Na so defensa, Mulet aseguró que l’argumentación de Foro “ye dalgo que recuerda al nacionalcatolicismu”, calificando de mitu del franquismu la batalla de Cuadonga y comparando a Pelayo col mitu del rei Arturu, lo qu’ofendió tanto al popular Fernando Goñi como a la propia Domínguez de Posada, qu’afaló al valencianu “a dir al psiquiatra”.

Sicasí, “lo que dixo Mulet foi una babayada”, asegura Sánchez Vicente, consultáu por Asturies.com. L’ex diputáu pol Partíu Asturianista (PAS) y escritor asturianu considera que “más allá de que la batalla de Cuadonga fora una engarradiella mayor o menor, foi l’orixe del Reinu d’Asturies, que dura dos sieglos y s’espande hacia’l sur”, apunta al tiempu que critica la visión centralista del mitu emplegada por Foro y PP.

“Los partíos políticos centralistes sienten vegoña de lo que somos”, añade l’escritor, que califica la retórica emplegada por Foro de “mui poco asturianista, gastada y vieya”. Un exemplu de dicha visión ponlo nel tratamientu institucional al triple centenariu de Cuadonga –esto ye, el primer centenariu de la coronación canónica de la Santina y de la creación del Parque Nacional de la Montaña de Covadonga, actualmente Picos d’Europa, y el decimoterceru de los oríxenes del Reinu d’Asturies–: “L’enfoque que-y tán dando nun ye’l correutu; veo repercusión dende los medios, pero non dende les instituciones, cuando podía sirvir pa reforciar la imaxe identitaria y atrayer turismu”.

Un amiestu “perversu”

Llope, pela so parte, considera que “entemecer los trés centenarios ye mui perverso” y entiende que tán condicionaos a “una visión españolista, irracional y supremacista”. “Trátase d’un allongamientu del covadonguismu clásicu”, añade l’escritor y miembru de la Fundación Belenos, “un mitu tan irracional que ye inabarcable”.

Ello ye que nun cree que puedan ponese los trés centenarios al mesmu altor, encamentando a dexar el de la canonización de la Santina al ámbitu priváu y sí destacando’l de la creación del Parque de Picos, que cree “mui importante medioambientalmente”. “Nun pue ser que volvamos otra vegada a interpretar en clave relixosa lo que ye la construcción d’Asturies como comunidá humana individual”, afirma.

Na so opinión, esta celebración debería aprovechase p’abrir un debate historiográficu al respeuto. Tamién de reinvención, repasando toles cróniques “de  magar les goticistes d’Alfonso III”.

Sobre la polémica del Senáu, Llope apunta que “Mulet tien básicamente razón no que diz, guste o nun guste”, y considera “oportuna” la comparación del rei Pelayo col mitu del rei Arturu. “Una cosa ye la construcción lliteraria d’un elementu históricu, que nun tien nada de malo, y otra utilizar esa cuestión como xustificación d’un nacionalismu español irracional”, apunta.