“Nin Cantabria nin Asturies son un parque temáticu”, asegura Barbón

El presidente Adrián Barbón participó esti miércoles nel conceyu cántabru d'Hermandad de Campoo de Suso nel pieslle del panel ciudadanu interautonómicu ‘Disparidades territoriales y demográficas en la Unión Europea: los retos de las regiones de montaña’. “Nin Cantabria nin Asturies son un parque temáticu. Nun lo somos”, recordó’l socialista.

Entamáu polos gobiernos d’entrambos territorios, el castiellu d’Argüeso acoyó esta xornada d’alderique sobre los retos pa los habitantes de zones rurales cola participación d’una trentena de ciudadanos asturianos y cántabros nel que tamién tuvo presente’l secretariu d’Estáu pal Retu Demográficu, Francesc Xavier Boya. La mesma desendolcóse de magar trés exes temátiques: educación en zones de monte, servicios de salú, y coneutividá y desarrollu empresarial.

“Nin Cantabria nin Asturies son un parque temáticu. Nun lo somos, y eso ye un error. Somos territorios que quieren vivir y que quieren garantizar calidá de vida”, aseguró na so intervención nel pieslle del panel ciudadanu xunto con Miguel Ángel Revilla, el so homólogu cántabru. Nesi puntu rescampló que “por supuesto que nos presta que venga la xente, que disfrute del nuesu paisaxe, de la nuesa xente, de la nuesa gastronomía, el nuesu patrimoniu natural”, pero que “nun se pueden diseñar polítiques pensando que les nueses comunidaes tán dispuestes a tresformar en parques temáticos”, insistió.

Dambos presidentes coincidieren tamién ayeri en Santiago de Compostela, nel ‘Foro Santiago. Camino de Consenso’ xunto colos de Galicia, Castilla y Lleón, Castilla-La Manca, Estremaúra, La Rioja y Aragón, onde se trató la financiación autonómica. “Nun nos llevemos a engaños. Ta en xuegu caltener escueles de cuatro alumnos, como tenemos en Cantabria y n’Asturies pa nun despoblar los núcleos rurales; la rede de consultorios periféricos de centros de salú nos conceyos pequeños; la rede d’hospitales rexonales; l’atención a los nuesos mayores, como fiximos agora na pandemia… Too ello ta en xuegu con esa financiación autonómica”, afirmó.

Al respeutó calcó en que “nun pidimos privilexos, lo que pidimos ye dar los mesmos servicios cola mesma calidá nel conxuntu del territoriu, sía’l conceyu de 50 habitantes o de 300.000. Y por eso s’esixe que cuantifiquemos coses: orografía, dispersión, despoblamientu, avieyamientu...”. “Pidimos nun ser más de los demás, pero nun tamos dispuestos a ser menos nin almitir lleiciones de naide –en referencia principalmente a les declaraciones de la presidenta de la Comunidad de Madrid, Isabel Díaz Ayuso qu’encamentó a les autonomíes aconceyaes ayeri en Galicia a baxar impuestos–” que diga “a cántabros y asturianos cómo tenemos que vivir, cómo tenemos que lluchar, cómo tenemos que trabayar o cuál ha ser el nuesu futuru”, siguió Barbón.

Na imaxe, Barbón y Revilla ayeri na Praza do Obradoiro de Santiago de Compostela. Semeya recortada a partir de la orixinal d'Armando Álvarez.