Barbón diríxese a Feijóo pa emponderar “el respetu fondu que sentís por esi patrimoniu inmaterial que ye la vuesa llingua”

Santiago de Compostela foi sede esti martes d’un aconceyamientu sobre financiación autonómica de 8 territorios, ente ellos Asturies, onde se consensuó una declaración institucional de 35 puntos. Na so comparecencia, Adrián Barbón dirixóse a Alberto Núñez Feijóo pa emponderar el respetu de Galicia a la llingua gallega.

Llueu de recordar al conseyeru fináu recién a los 60 años, Valeriano Martínez García, responsable de Facienda y Alministración Pública, el presidente socialista agradeció al popular “la so acoyida nesta tierra hermana d’Asturies, que ye Galicia, na que siempre ye un placer tar sobre manera por ver el vuesu patrimoniu, la vuesa forma de vida y el respetu fondu que sentís por esi patrimoniu inmaterial que ye la vuesa llingua, que vive y comparte la ciudadanía”. Unes pallabres de Barbón que lleguen en plenes negociaciones de reforma del Estatutu y col PP d’Asturies nuna postura contraria dafechu a la oficialidá de los idiomes propios del país.

Na so intervención rescampló “l’actitú constructiva” del alcuentru de presidentes, nel que participaron los socialistes Concepción Andreu (La Rioja), Emiliano García-Page (Castilla-La Mancha), Francisco Javier Lambán (Aragón) y Guillermo Fernández Vara (Estremaúra); los populares Feijóo y Alfonso Fernández Mañueco (PP); y Miguel Ángel Revilla, del PRC cántabru. “Buscamos posiciones non frentistes, que contribuyan al consensu. Tamos aportando al alderique qu’habrá qu’abordar, en materia de despoblamientu o materia de financiación autonómica, una visión yá construyida de manera plural, y esto favorez el diálogu como reflexón de cara al futuru”, aseguró.

“Nós lo que defendemos nun ye que tengamos más posibilidaes, sinón que los servicios que s’ufierten a los ciudadanos sían iguales nel conxuntu del territoriu, en toles comunidaes cola mesma calidá”, pa lo que “namái hai un camín: ponderar determinaes circunstancies como ye’l costu real de los servicios, como ye l’avieyamientu de la población, como ye la dispersión, como ye’l despoblamientu, como ye la orografía. Son cuestiones que tienen muncho que ver”, siguió’l llavianés en defensa del estáu de bienestar.

Un 24,13 por cientu de la población

Del ‘Foro Santiago. Camino de Consenso’, como se llamaba l’alcuentru de presidente, salió una declaración institucional compuesta por 35 puntos que recueyen los deseos d’estes ocho autonomíes, que suponen el 61,97 por cientu del territoriu estatal y el 24,13 por cientu de la población. “Defendemos y persiguimos un desarrollu social y económicu equilibráu, cola aspiración de que cualquier persona n’España tenga les mesmes oportunidaes”, resume’l testu qu’abre la esposición de dichos puntos.

Na semeya, Barbón na so comparecencia, ente Núñez Feijóo y Revilla.