‘Nel cantu la memoria’, espaciu nuevu de TPA sobre los cantares que marcaron la nuesa música

|
Logu 'Nel cantu la memoria'

Esti xueves, a les 22.15 hores, va estrenase ‘Nel cantu la memoria’ en TPA. Esta serie documental, compuesta por cinco capítulos nuna primer temporada, investiga sobre los cantares que marcaron la memoria coleutiva de los asturianos y asturianes.

Vanessa Gutiérrez ye la conductora d’esti programa que va fixase naquellos temes tradicionales o modernos que son parte de la nuesa vida y que nun falten nes celebraciones populares o familiares. Asina, nel capítulu de la estrena, el protagonista va ser el ‘Asturias’ de Víctor Manuel, poema musicalizáu del poeta salmantín de nacimientu y andaluz de crianza Pedro Garfias que pue ser consideráu l’himnu estraoficial del país.

Amás de poder sentir el tema, músicos, espertos y xente de la cai van falar sobre’l cantar y sobre qué ye lo que-y tresmite, modelu que se va repetir en tolos capítulos, convirtiendo asina a ‘El cantu la memoria’ nun repás a la historia de la música asturiana nel sieglu XX. Como complementu, en cada episodiu va reinterpretase la pieza analizada dando-y una vuelta al estilu.

Xunto al ‘Asturias’ de Víctor Manuel, van formar parte d’esta primer temporada de ‘El cantu la memoria’ los populares ‘Soi de Verdicio’ y ‘Chalaneru’; ‘Nun yes tu’, de Los Berrones’; y ‘Soy un macarra’, d’Ilegales. Tres la estrena d’esti xueves, TPA tamién va emitir dos especiales sobre Víctor Manuel.

Contador Estadistiques