Navia va acoyer en payares la final del Premiu Camaretá al Meyor Cantar

La final del XII Premiu al Meyor Cantar, que nesta edición incorpora’l nome Camaretá como homenaxe a esta agrupación cultural y musical, va tener llugar nel Cine Fantasio de Navia’l 13 de payares. Rodrigo Cuevas, Silvia Quesada, Mapi Quintana y Slum Suit son los escoyíos pol xuráu pa defender los sos temes na gala.

Ésti tuvo compuestu polos músicos Alicia Álvarez, Pablo Moro y Naomí Suárez, la periodista y escritora Aitana Castaño, y la filóloga y profesora Mercedes Ruisánchez, baxo presidencia d’Antón García, direutor xeneral de Política Llingüística. Ente tolos cantares presentaos al concursu, con recompensa de 6.000 euros, los miembros tuvieron en cuenta la calidá na composición y les interpretaciones vocal y instrumental, amás de la correición llingüística de la lletra y l’usu de la llingua asturiana o’l gallego-asturiano.

‘Rambalín’, de Rodrigo Cuevas; ‘La mesma revolución’, de Silvia Quesada; ‘Cantar pa durmir un ninín’, de Mapi Quintana; y ‘L’espeyu’, de Slum Suit, son los cuatro temes finalistes que van competir na final de Navia. Ésta ye la primer vegada que la gala tien llugar nel occidente.

Los cantares qu’entren a concursu nesta decimosegunda convocatoria del gallardón correspuenden al añu 2019 y la primer metá del 2020. Los ganadores de la edición anterior (2017 y 2018), celebrada l’añu pasáu en La Felguera, foron Lafu y Rebeca con ‘Les sombres sobre la yerba’.

Na semeya, el Cine Fantasio nuna imaxe de febreru, enantes de la pandemia.