Lafu y Rebeca ganen en La Felguera'l XI Premiu al Meyor Cantar con ‘Les sombres sobre la yerba’

El meyor tema n’asturianu y gallego-asturiano del 2017 y 2018 ye ‘Les sombres sobre la yerba’, de Lafu y Rebeca. El dúu defendió esta composición na gala del XI Premiu al Meyor Cantar celebrada’l vienres nel Teatru Nuevu de La Felguera, convenciendo al xuráu.

Con lletra del propiu Alejandro Lafuente ‘Lafu’, el cantar ganador superó na final a Xaime Martínez, qu’interpretó ‘Discursu de Belarmino Tomás ente los soldaos mentes camina sobre les agües del ríu Nalón’; Los Berrones, con ‘¿Esto pa qué val?’; y la Banda de Gaitas El Trasno, con ‘Oldenburg’. Lafu y Rebeca lleven una recompensa de 6.000 por trunfar nesta edición, la primera que cuenta con premiu económicu.

Na gala de La Felguera, na primer xornada de la XL Selmana de les Lletres Asturianes, dedicada a la música n’asturianu, Luis Nuñez y los Folgazanes, que nel 2017 llevaron con ‘La ñeve y la esmeralda’ el Premiu al Meyor Cantar del 2015 y 2016, interpretaron dellos temes. El palmarés d’esti gallardón complétenlu Toli Morilla, con ‘Azul y gris’ (2007); Herbamora, con ‘Nosh’ (2008); Alfredo González, con ‘La nada y tu’ (2009); Xera, con ‘Tierra’ (2010); Skama la Rede, ‘Condenáu’ (2011); Asturiana Mining Company, ‘Si nun conoces Vaḷḷouta’ (2012); Taranus, con ‘Ensin ti’ (2013); la Banda de Gaitas El Trasno, con ‘Volviche’ (2014); y Anabel Santiago, con ‘La lloca’ (2016).

‘El mio cantar’

L’Auditoriu de La Pola Siero acueye esti tarde, a les 18 hores, la gala musical escolar que sirve de presentación del CD ‘El mio cantar’, nel que grupos asturianos interpretan temes compuestos por alumnes y alumnos de dellos centros. Ésti yá se pue disfrutar en Spotify al completu con cantares como ‘Cómo atopate’, al que pon música Skama la Rede, o ‘Metal ḷḷimiego’, de Skontra.

La banda de punk-folk va tar presente nesti actu incluyíu na programación de la XL Selmana de les Lletres Asturianes. Completen la participación Corquiéu, Guaja D, Libre y L-R.