Navelgas acueye un homenaxe nuevu al llingüista Manuel Menéndez García

|

El llingüista Manuel Menéndez García, fináu nel 1962 a los 53 años d’edá, va ser protagonista d’un homenaxe nuevu, nesta vegada nel so conceyu de nacencia. Navelgas va acoyer esti vienres una xornada dedicada al autor de ‘El Cuarto de los Valles’, estudiu dedicáu a la fala de la zona que na so tercer edición espublizada recién incorpora testos inéditos.

La Universidá d’Uviéu, al traviés del Seminariu de Filoloxía Asturiana; el Real Instituto de Estudios Asturianos (RIDEA);  l’Aula Valdés-Salas; la Fundación Valdés-Salas; y la Fundación Aula de las Metáforas entamen esti eventu que garra’l relevu de les xornaes celebraes poles dos primeres instituciones a finales d’ochobre n’Uviéu. Nesta ocasión, Navelgas ye’l llugar escoyíu pa esti homenaxe a un llingüista que, con ‘El Cuarto de los Valles, marcó l’estilu de los estudios monográficos de les fales asturianes nos años 60 y 70.

La xornada, de nome ‘Manuel Menéndez ya la Asturias occidental mediu sieglu depóis’, va desendolcase a partir de les 17 hores na Casa Cultura cola presencia d’un representante del Conceyu de Tinéu y del direutor del Aula Valdés-Salas, Isidro Sánchez Álvarez, que van dar unes pallabres d’afayamientu. La primer intervención va correr a cargu de Ramón Rodríguez Álvarez, direutor del RIDEA, pa darréu proceder a la presentación de ‘El Cuarto de los Valles. III. Toponimia, refranes y conjuros’, a cargu de los sos editores Ramón d'Andrés y Taresa Fernández Lorences. Esta edición sigue a les dos primeres, del 1963 y 1965, y incorpora testos inéditos que s’atoparon en Madrid na tesis almacenada na Universidad Complutense sobre la fala de Navelgas en dos subdivisiones: refranes y conxuros, y una rellación alfabética de toponimia de la zona. Trátase de “una reproducción fiel de los testos que dexó escritos a máquina” que incorpora, na parte de la toponimia, “comentarios que comparen lo recoyío por Manuel Menéndez colos estudios toponímicos posteriores”, esplica D’Andrés.

L’actividá va continuar cola presentación del mapa de la toponimia tradicional de Conceyu de Tinéu, a cargu de Fernando Álvarez-Balbuena y Andrés Menéndez, miembros de l’asociación El Teixu, pa finar con un recital de poesía a cuenta de Xuan Bello, Antón García y Miguel Rojo. De manera paralela al actu, va inaugurase la muestra de semeyes ‘L’Asturias occidental antias ya güei’, que va tar abierta al públicu la quincena próxima.

Contador Estadistiques