L'homenaxe a Manuel Menéndez complétase con un llibru dedicáu al llingüista

El Seminariu de Filoloxía Asturiana (SFA) de la Universidá d'Uviéu ta acabante d'espublizar, xunto a Ediciones Trabe, 'Manuel Menéndez y l'Asturies occidental'. Esti llibru completa l'homenaxe que dende'l 2014 entamó xunto col RIDEA al autor de la tesis ‘El Cuarto de los Valles, un habla del occidente asturiano’.

Dialeutólogu, etnógrafu y arqueólogu, Manuel Menéndez García finó nel 1962 a los 53 años d'edá, dexando escritu esti estudiu dedicáu a la fala d'esta zona de Tinéu que na so tercer edición espublizada nel 2015 incorporó testos inéditos. Esta obra marcó l’estilu de los estudios monográficos de les fales asturianes nos años 60 y 70 y centró esti homenaxe qu'agora la SFA completa col llibru 'Manuel Menéndez y l'Asturies occidental'.

La espublización, que coordina Ramón d'Andrés ábrese con un prefaciu, al que-y sigue seis artículos. Xulio Viejo firma'l primeru, '¿Esiste l’asturianu occidental?', pa depués continuar con otros de D'Andrés ('La frontera ente l’asturianu y el gallegu: elementos pa un análisis horiométricu'); Andrés Menéndez Blanco ('Toponimia ya arqueoloxía: dalgunos apuntes sobre’l sou usu complementariu a partir d’experiencias investigadoras na Asturias occidenta'); José Avelino Gutiérrez González, Patricia Suárez Manjón y Jesús Ignacio Jiménez Chaparro ('Arqueología del valle del Esva en los trabajos de Manuel Menéndez: la fortificación de El Castieḷḷu de Ovienes / Ubienes y su entorno'); María Josefa Sanz ('El monasterio de Obona: la recuperación de su fondo documental'); y Adolfo García Martínez ('La familia del Cuarto de los Valles: troncalidad, patrilocalidad y mayorazgo'). Por últimu, inclúi unos resúmenes.