“N’Asturies vamos asegurar mui pronto nel Estatutu la oficialidá de la llingua”, asegura Ripa

|
“N’Asturies vamos asegurar mui pronto nel Estatutu la oficialidá de la llingua”, asegura Ripa

La oficialidá del asturianu tuvo un güecu nel discursu de Daniel Ripa, secretariu xeneral de Podemos, na Folixa Popular qu’entamó la formación con motivu del Día d’Asturies. Mario Suárez del Fueyo, secretariu xeneral de Podemos Xixón y voceru de Xixón Sí Puede, criticó’l “covadonguismu ranciu” na so intervención.

Dambos participaron nel actu políticu celebráu na tarde del sábadu énte un públicu qu’enllenaba la carpa instalada nel Solarón. Xunto a ellos Yolanda Huergo, conseyera ciudadana de Podemos Xixón, y los convidaos Iñigo Errejón, diputáu de Xuníos Podemos; Noelia Vera, covocera de Xuníos Podemos nel Congresu; Xulio Ferreiro, alcalde d’A Coruña; y la francesa Martine Billard, ex copresidenta del Parti de Gauche y coordinadora d’Ecoloxía de La France Insoumise.

Ripa citó lluches obreres, como la que tán protagonizando trabayadores de Vauste (ex Tenneco), destacó l’arguyu de “echar a Rajoy” y recordó dalgunos de los ésitos de Podemos, como’l pagu esti cursu de la metá de la matrícula nes escueles de 0 a 3 años. Tamién fixo referencia al casu ‘Enredadera’ y felicitóse de la llimpieza de los cargos públicos del partíu, como Rubén Rosón, al “nun tener tratu los corruptos con nós por ser de Podemos” como amosó una llamada interceptada entre un ex funcionario municipal del Área de Seguridá del Conceyu d’Uviéu y 'El Patatero', consiguidor de la trama.

Darréu miró pal futuru y enumeró les coses “que vamos consiguir”. Asina, nel capítulu de derechos y rexeneración, aseguró que “n’Asturies vamos tener mui pronto el fin de los aforamientos, la reforma eleutoral, la llende de salarios y mandatos, el blindaxe de derechos sociales nel nuesu Estatutu d’Autonomía y l’aseguramientu de la oficialidá de la llingua”. Nesi momentu, aprovechó pa recordar la salida de tonu nueva de la popular Mercedes Fernández na Xunta Xeneral y dirixóse al voceru nuevu de la formación, Enrique López Hernández:  “Kike, yo sentíte n’asturianu y entendíte perfeutamente’l xueves, non como Cherines”.

Herederos d’un pasáu

El feminismu ye otru de los asuntos nos que va trabayar Podemos. “L’Asturies que naz ye feminista y les lluches sociales encabécenles muyeres, dende’l SAD a Duro Felguera. N’Asturies va haber pronto aiciones contra la fienda salarial y de pensiones, contra les violencies sexuales y los feminicidios y n’apoyu a un sistema públicu, universal y gratuitu de dependencia”, apuntó.

No que respeuta al futuru del país, señaló que “va haber pronto midíes contra la emigración y la espoblación, pola gratuidá del 0 a 3 y pa finar coles llistes d’espera. La espoblación, l’avieyamientu, la emigración de mozos... Habrá futuro si se dexa a la mocedá desendolcar el so proyeutu equí”, apuntando al respueto la necesidá de la gratuidá de les matrícules universitaries y de planes de vivienda y emplegu xoven, sobre manera nes zonas rurales.

“Nun queremos una Asturies onde la felicidá tea nes postales turístiques, sinón que tea nes cares de les xentes”, aseguró. Mentes, sobre la contaminación, defendió “una Asturies con un aire sano, onde la inversión n’evitala valorice a les empresas y alloñe cualesquier esllocalización. Y yá lo tamos faciendo n’Avilés, Uviéu, Carreño o Xixón, onde gracies a nós mídese la calidá del aire”.

“Tái arguyoses de lo que somos. Tái aguyosos de lo que somos. Somos la xente de Podemos y tamos camudando esta tierra. Somos herederos d’una Asturies que constituyó’l so autogobiernu énte la invasión napoleónica nel 1808, d’unos obreros qu’asomaron al mundu creyendo nuna revolución nel 1934 y que volvieron llevantase na Fuelgona del 62 poles llibertaes civiles, empezando a enterrar al franquismu”, siguío Ripa, amás de “de les lluches sociales tamién en democracia” y de los “trabayadores y funcionarios que s’alzaron contra los recortes”.

Dos Asturies

Suárez Del Fueyo, que tamién fixo referencia a ‘Enredareda’ nel so discursu,  xunto al Solarón y al estáu del Plan de Víes y la Casa Sindical, señaló que “güei, 8 de setiembre, vemos de manera nidia qu’hai dos Asturies. La del covadonguismu ranciu, la que s’envuelve nel mantu de la virxe y de la monarquía pa caltener los sos privilexos y la visión más reaicionaria de la cultura, qu’al empar amiesta instituciones con relixón, siempre pa beneficio d’ésta última; y l’Asturies real, representada equí pero entovía insuficiente p’abrir esi cambiu políticu, cultural y social”.

Semeya obra de Daniel López.

Contador Estadistiques