Namái 2 de les 36 empreses públiques cumplen la Llei de Tresparencia

El Conceyu por Otra Función Pública n'Asturies (COFPA) alerta que namái ITVASA y Sedes espublicen de forma correuta la información esixida.

N'avientu entró en vigor pa toles comunidaes autónomes la Llei de Tresparencia, Accesu a la Información Pública y Bon Gobiernu qu'afeuta a les empreses que tean participaes, direuta o indireutamente, en más d'un 50 por cientu poles alministraciones públiques, asina como tamién a les fundaciones públiques. Casi once meses depués, de les 36 esistentes nel país namái dos cumplen colo esixío por esta norma, en concreto, ITVASA y Sedes.

Ente estes obligaciones llegales tán la espublización d'un organigrama actulizáu qu'identifique a los responsables de los diferentes órganos de les mesmes, asina como'l so perfil y trayeutoria profesional. Tamién la retribución añal de los altos cargos y responsables máximos de les empreses, y les indemnizaciones que reciben cuando abandonen el puestu.

"Con caráuter xeneral, les empreses y fundaciones públiques integraes nel sector públicu del Principáu oculten les retribuciones de los sos xerentes o direutores y los sos currículos profesionales, asina como les retribuciones que, nel so casu, perciben los miembros de los conseyos d'alministración y de los patronatos. Nos casos de SOGEPSA y VIPASA, tampoco nun s'informa de les indemnizaciones percibíes polos sos anteriores xerentes tres abandonar recientemente'l cargu", critica COFPA.

Nesti enllaz pue comprobar, una a una, la situación de toles empreses y fundaciones públiques del país.