Los 18 entes públicos y organismos autónomos tampoco nun cumplen cola Llei de Tresparencia

Nengún espubliza de manera correuta la información que demanda la norma.

La Llei de Tresparencia, Accesu a la Información Pública y Bon Gobiernu, en vigor pa les comunidaes autónomes dende avientu, obliga a los ente públicos y organismos autónomos a facer públicu un organigrama actualizáu qu'identifique a los responsables de los diferentes órganos y el so perfil y trayeutoria profesional, asina como les retribuciones percibíes añalmente polos altos cargos y máximos responsables de diches entidaes y, igualmente, les indemnizaciones recibíes nel casu d'abandonar el cargu. Según el Conceyu por Otra Función Pública n'Asturies (COFPA), nengún de los 18 esistentes n'Asturies cumple con esta obligación.

"Con caráuter xeneral, toos ellos oculten les retribuciones de los sos direutores y xerentes , asina como les retribuciones que, nel so casu, perciben los miembros de los sos órganos direutivos pola asistencia a les sos reuniones", esplica'l COFPA, que'l mes pasáu facía un análisis sobre'l cumplimientu d'esta mesma llei n'empreses públiques con similares resultaos llaceriosos: sólo 2 de les 36 asturianes cumplen cola Llei de Tresparencia. "Tres esti repás al sector públicu completu del Principáu d'Asturies, podemos concluyir que la prioridá pal Gobiernu del Principáu debería ser asegurar que les obligaciones de Llei de Tresparencia estatal se cumplan d'una manera real efeutiva enantes d'embarcase n'aprobar una Llei de Tresparencia propia", asegura.

Nesti enllaz pue comprobar, ún a ún, la situación de tolos ente públicos y organismos autónomos del país.