Muros pierde l'apellíu 'de Nalón' impuestu por decretu estatal nel 1916

|
Muros

La toponimia tradicional del conceyu yá ye oficial, derogando la castellana.

La espublización ayeri nel Boletín Oficial del Principáu d'Asturies (BOPA) del espediente toponímicu de Muros aprobáu en Conseyu de Gobiernu convierte a estos topónimos nos únicos oficiales. Ente les novedaes destaca la perda del apellíu 'de Nalón', impuestu por decretu del Gobiernu estatal nel 1916, d'igual forma qu'a otros 572 ayuntamientos –tamién taben afeutaos Corvera 'de Asturias' y Tapia 'de Casariego–, cola fin de nun confundilos con otros d'igual denominación.

El núcleu que recupera el nome de llugar tradicional ye Reboriu, que sustitúi al castellanizáu 'Reborio', mentes que se rexistren topónimos como L'Escorial, El Regueiru, Campufríu o Las Casinas. San Esteban, pela so parte, sigue recoyíu ensin el 'de Pravia' que dalgunes persones y instituciones empleguen.

Muros conviértese asina nel conceyu númberu 65 en recuperar la so toponimia. Cabrales, Llanera, Castropol y Somiedu serán los próximos en siguir los sos pasos, mentes qu’en diferentes fases del procesu tán Cuideiru, Ayande, Caravia, Ibias, El Valle Baḥu de Peñamellera, Salas, Navia y Pravia, cola esceición d'Eilao, l'únicu pendiente d'aniciar el procesu.

AdxuntuTamañu
PDF icon BOPA toponimia Muros231.63 KB
Contador Estadistiques