Movimientos en Podemos y nel PP: abren espediente d'espulsión a Tomé, Elipe y Tuero, y Canga abandona Asturies

La única diputada de la formación morada pide la dimisión d'Ione Belarra depués de la decisión del partíu en Madrid. El candidatu popular argumenta motivos familiares.

El vienres Cova Tomé informaba de la comunicación por parte de Podemos de la so salida obligada del partíu, una decisión qu'entovía nun ye definitiva –abriéronse los procedimientos y resolveráse la situación nunes selmanes–y que tamién afeuta a Xune Elipe y Laura Tuero, compañeros de llista de la valdesana, y una ventena de persones más. "La xestora nomada va una selmana por Belarra abría nuevamente un espediente pa espulsar a les 3 persones que mayor sofitu recibimos de la militancia la última vez que se permitió votar a la xente en Podemos Asturies. Demostróse, magar les mentires, que les amenaces d'espulsión que llevamos anunciando desde va meses yeren reales", manifestaba al día siguiente.

"Con ello Ione Belarra amosó que yá nun representa los principios de Podemos, ha dimitir y convocar una Asamblea Ciudadana Estatal. Purgar a los que tienen el sofitu de la xente por miedo a ser derrotaos nes urnes nunca foi l'estilu de Podemos. Cola so política de purgues p'algamar el control absolutu del partíu, la direición de Belarra estrozó los territorios y conduxo a Podemos al fracasu de les eleiciones autonómiques y conceyiles", siguió la diputada na Xunta Xeneral, que señaló que "Palacios, Olaya Suárez y Sara Retuerto tán actuando como títeres de Madrid nesta vergoña democrática".

De vuelta a Bruxeles

Esi mesmu día Canga convocaba a los medios pa les 14 hores pa lleer una carta destinada al secretariu xeneral del PP, Álvaro Queipo, nel que comunicaba la so dimisión pa volver a Bruxeles. La intervención arrancaba cola anuncia del candidatu de que, llueu de facer pública la mesma, ensin la posibilidá de facer entrugues, marchaba direutu al aeropuertu pa garrar un avión.

Esplicaba'l funcionariu de la Xunión Europea (XE) que la previsión que tenía yera que la so esposa s'instalara n'Asturies depués de les eleiciones, "sicasí, un fechu reciente, inesperáu dafechu, oblígame a regresar cola mio familia". Aseguró que dexa la so curtia etapa política "cola cabeza alta" y fixo referencia a los meyores resultaos eleutorales del so partíu –"dexo'l PP asturianu muncho meyor de lo qu'atopé a la mio llegada", afirmó–.

Poco enantes, Queipo, que va ser el voceru parllamentariu en sustitución de Canga, anunciaba la convocatoria del congreso del PP, que nun se celebraba dende va 6 años, cuando salió escoyida como presidenta Mercedes Fernández. Ye previsible que tenga llugar en payares.

Na semeya, Elipe, Tomé y Tuero'l sábadu na uvieína plaza la Escandalera