Misiva torna al escenariu pal conciertu pol so ‘X+2 aniversariu’ con cantar y videoclip nuevu

Nel 2020 dos aplazamientos pola situación sanitaria impidieron a Misiva celebrar el so conciertu décimu aniversariu, que finalmente fixo en llinia na so canal de YouTube. Esti sábadu retómalu con Los Bárcenas como banda convidada y con cantar con videoclip salíu recién del fornu, ‘La misiva’, un tema cargáu d'optimismu.

La uvieína sala Gong va acoyer la actuación del grupu moscón, con entamu previstu pa les 21.30 hores. Va ser el primer conciertu en persona en dos años años, cola esceición única del fechu tamién n’Uviéu’l branu pasáu, nel Kuivi PopUp.

Pa esta cita especial va contar cola compañía de Los Bárcenas, grupu de versiones punk-rock que precisamente tocaron nesa mesma xornada nel festival celebráu en San Llázaro. Les entraes yá tán a la venta de manera anticipada a un preciu de 10 euros en llinia o en La Bomba Records de forma física, que van xubir a 13 na puerta.

El conciertu ‘X+2 aniversariu’ llega tamién con tema nuevu. Ye ‘La misiva’, un cantar con un mensaxe d’optimismu y ilusión qu’homenaxa a la so trayeutoria y que vien acompañaú de videoclip diríxiu por Titi Muñoz, que yá s’encargara del curtiumetraxe de Misiva ‘L’últimu aliendu’.

Nel audiovisual collaboren familiares y collacios del grupu, ente ellos componentes de Desakato y Mala Reputación, y busca tresmitir tola enerxía que lleva acompañando a la banda de Grau per más d’una década. ‘La misiva’ grabóse n’OVNI Estudio con Pablo Martínez, de Desakato, y reflexa l’estáu d’ánimu nuevu del grupu, dexando de llau l’atmósfera apocalíptica del so trabayu anterior, con un soníu más contundente.

Esta llinia optimista llévase tamién al apartáu gráficu, apostando’l so diseñador Rubonón por colores más vivos y elementos más gayoleros.