Misiva lleva l'asturianu al Resurrection Fest

La banda moscona ye la primera que va interpretar un repertoriu n'asturianu dafechu nesti festival gallegu, consideráu de los meyores del estilu a nivel européu.

Con cambiu de fecha y horariu d'última hora, Misiva va encargase d'abrir mañana les actuaciones del Main Stage a les 15 hores. Más tarde van pasar per esi mesmu escenariu Lamb of God, Within Temptation o King Diamond, ente otros.

D'esta forma los de Grau van ser los primeros en protagonizar un conciertu completu en llingua asturiana en Viveiro, onde enantes pudo sentise la nuesa llingua en cantares sueltos de bandes como Escuela de Odio. El Resurrection Fest trátase d'un festival cimeru n'Europa de música estrema, tocando una gran variedá de xéneros, que van dende'l death metal al hardcore o'l punk.

Tormenta llétrica mientres Slayer

La edición del añu pasáu axuntó a 81.352 persones dividíes en cuatro díes de certame, y esti añu la organización pretendía llegar a los 100.000. Parkway Drive y Slayer, na so despidida nel Estáu, protagonizaron la xornada d'ayeri marcada por una tormenta qu'obligó a acortiar el conciertu de la veterana banda estauxunidense.

Güei'l turnu va ser pa Slipknot y Converge, y mañana pa Within Temptation y Cult of Luna, ente otres munches formaciones.