Misiva celebra diez años de vida con un curtiumetraxe musical qu’enllaza los sos trés cantares nuevos

‘L’últimu aliendu’ ye’l trabayu col que Misiva, banda de punk-rock de Grau, celebra los sos diez años sobre los escenarios. Trátase d’un curtiumetraxe musical de temática post-apocalíptica dirixíu por Titi Muñoz, ganador del AMAS 2019 al meyor videoclip, qu’enllaza los trés cantares nuevos de la banda espublizaos tamién como EP.

La situación pola pandemia de COVID-19 torgó los planes de los moscones de presentar ‘L’últimu aliendu’ el pasáu día 7 nel uvieín Teatru Filarmónica, pero los siguidores del grupu yá pueden disfrutar d’esti curtiumetraxe que dexa ver ‘Esclavos del momentu’, ‘Héroes ensin nome’ y ‘Qu’arda’l sol’, que tamién se pueden sentir nes principales plataformes dixitales de música. Trés cantares “con un mensaxe de denuncia social y optimista a la vez, mui afayadizos pa los tiempos que tamos viviendo” grabaos nos OVNI Estudios de Pablo Martínez (Desakato) y masterizaos n’Estaos Xuníos por Brad Boatright.

Misiva amuesa un gran estáu de forma nestes pieces que confirmen la evolución de la banda, que nel 2019 convirtióse na primera en llevar un repertoriu dafechu n’asturianu al Resurrection Fest, certame con sede en Viveiro que se consolidó nos años últimos como’l más importante del estáu de soníos estremos, tocando una gran variedá de xéneros que van dende'l death metal al hardcore o'l punk, y ún de los más sonadía d’Europa, con 102.053 asistentes na edición última con Slayer como cabeza de cartelu. Pal 4 de setiembre tien previsto la celebración del conciertu especial pol décimu aniversariu pa repasar los sos cuatro discos na uvieína Sala Tribeca, cita na que va tener como convidaos a los llocales Amplify.