Mercedes Fernández acusa al Gobiernu d’incumplir la llei col plan pa facer l’asturianu llingua vehicular

“Dexe de facer esperimentos col bable” esixó la vocera del PP na Xunta Xeneral, Mercedes Fernández, al presidente Javier Fernández nel Plenu d’esti vienres. La líder popular n’Asturies acusó al Executivu d’incumplir la llei col proyeutu pilotu pa facer l’asturianu llingua vehicular en Primaria’l cursu que vien.

Según los argumentos espresaos por Mercedes Fernández, l’Estatutu d’Autonomía nun contempla l’asturianu como llingua oficial, polo que’l so usu como idioma vehicular na Educación ye illegal. "La única llingua vehicular ye'l castellanu, pero Javier Fernández ta devolviendo favores por tar sentáu na siella de Presidencia ensin facer munches coses”, dixo na so intervención.

Pela so parte, el líder socialista solicitó a la popular que nun falsie la realidá y recordó que dar delles materies n’asturianu va ser opcional pa los escolinos y escolines. El plan esperimental pal usu vehicular del idioma en tolos niveles educativos yera ún de los puntos qu’afitaba la petición d'un Plan de Dignificación del Asturianu, consensuáu pola FSA-PSOE, Podemos, IX y Foro y que recibió’l preste de la Xunta Xeneral el 16 d’ochobre del 2015 cola astención de Ciudadanos y el votu en contra del PP.

Esta midida va entrar en marcha’l cursu que vien en Primaria, como adelantó ayeri Asturies.com, en al rodiu media docena de centros educativos y en delles materies, que podríen ser Ciencies Sociales, Educación Física o Plástica. Al menos el 50 por cientu de los conteníos de l’asignatura, que taría impartida pol maestru tituláu de la mesma, sería n’asturianu.

La Conseyería d’Educación y Cultura ta anguaño falando cola comunidá educativa de les escueles con una matriculación en Llingua Asturiana o Gallego-asturiano cercana al cien por cien pa escoyer los centros onde desendolcar finalmente esti esperáu plan esperimental.