Melilla quier defender la llingua amazigh

Mustafá Aberchan, presidente de "Coalición por Melilla" pidió ayeri'l sofitu de los grupos con representación en Congresu de los diputaos pa da-y al amazigh, llingua d'aniciu bereber que falen los melillenses rifeños, un status de protección que nun tien anguaño nuna ciudá onde'l castellanu ye la única llingua oficial. El políticu propón como casu a imitar el de la llexislación sobre l'asturianu.

Izquierda Xunida foi la encargada de llevar al congresu la petición de la ciudá de Melilla, de 65.000 habitantes y onde los trés grupos políticos representaos na casa conceyu, CPM, PP y PSOE abrieron un debate tres del que se llegó a un consensu pa da-y al amazigh un estatus mínimu de protección como primer pasu pa llograr que se caltuviere. El casu del asturianu foi l'exemplu pol que se mandaron los políticos de Melilla pa llevar alantre la so reivindicación, que por de pronto supón un primer pasu pa dignificar una llingua davezu arrequexada.

L'amazigh, una llingua milenaria estremada dafechu del árabe, tien el so aniciu na cultura bereber del Rif y el so tueru llingüísticu espárdese pel norte d'África. Arrequexada pola alministración colonial española y francesa, l'amazigh sufre tamién la competencia del árabe, que ye la llingua de prestixu social en Marruecos y Arxelia.

Ello ye que la Mesa del Congresu de los Diputaos va tratar güei una proposición non de llei sobre'l "reconocimientu de los derechos d'identidá cultural de la población melillense" . Dellos puntos de la proposición falen de la identidá amazigh, la so historia, llingua y cultura como "parte fundamental" de la identidá de la Ciudá Autónoma de Melilla, espardiendo la referencia a Ceuta.

Pa saber más sobre la cultura amazigh:
Congresu mundial Amazigh
Amazigh - Voice
Azawan (música Amazigh)
Páxines de la Universidá de Barcelona sobre cultura amazigh