La matrícula pa la UABRA va tar abierta hasta esti vienres

Cangas del Narcea acueye un añu más la Universidá Asturiana de Branu (UABRA), qu'algama la so sétima edición y que va celebrase ente'l 1 y 12 d'agostu. Les persones interesaes en participar en dalgún de los cursos qu'ufre l'Academia de la Llingua Asturiana (ALLA) tienen hasta'l vienres pa matriculase.

María Cristina Valdés, direutora xeneral d'Universidaes y Investigación, dirixe la UABRA per segundu añu, con Pablo Xuan Manzano como coordinador xeneral y Xosé Ramón Iglesias Cueva como secretariu. La Universidá d'Uviéu y el Conceyu de Cangas del Narcea collaboren xunto cola ALLA nel entamu d'esta actividá que tien la Casa-Hogar de Cangas como cuartel xeneral.

El formatu d’esta iniciativa va ser el mesmu d'años anteriores, cola celebración de los cursos clásicos, la ufierta de cuatro ‘Cursos d’Afondamientu Cultural y Llingüísticu’ y d’otros seis d’estensión universitaria p’alumnos de la institución. De manera paralela, tamién se celebrarán delles charres y actividaes en Cangas.

Los cursos más veteranos son el ‘Cursu Elemental de Llingua Asturiana’ y el ‘Cursu Avanzáu de Llingua Asturiana’, que tienen un costu de 300 euros, cantidá qu’inclúi los materiales y la pensión completa na Escuela-Hogar de Cangas, y que consten de 60 hores llectives. A ellos hai que sumar el ‘Cursu de Gallego-asturiano (segunda fase)’, destináu a maestros de Primaria y Secundaria, con 40 hores llectives ente'l 1 y el 6 d'agostu y un costu de 190 euros.

La ufierta de los ‘Cursos d’Afondamientu Cultural y Llingüísticu’, destinaos a maestros o llicenciaos y persones que tengan el ‘Cursu Avanzáu de Llingua Asturiana’, ta formada por cuatro opciones. La primer selmana (del 1 al 6 d’agostu) va impartise ‘Capacitación pa la traducción al asturianu’, a cargu de Marta Mori, y ‘Internet y Educación, un enfoque práuticu’, coordináu por David Melendi. Mentes, pa la segunda selmana (del 8 al 12 d’agostu), Roberto González-Quevedo va dar ‘Xuegos y tradiciones populares asturianes’ y Carlos Lastra, ‘Ecoloxía y Mediu Ambiente n’Asturies’. La matrícula pa estos cursos, de 35 hores llectives, ye tamién de 190 euros, con too incluyíu.

Cursos d'Estensión Universitaria

Tamién van entamase ‘Cursos d’Estensión Universitaria’ en collaboración cola Universidá d’Uviéu colos qu’estudiantes universitarios van poder algamar 4,5 o 6 creitos de llibre configuración. La ufierta nesta propuesta nesta estaya ye la siguiente: ‘Cursu Elemental de Llingua Asturiana’ y ‘Cursu Avanzáu de Llingua Asturiana’, de 40 hores llectives; ‘Capacitación pa la traducción al asturianu’, ‘Internet y Educación, un enfoque práuticu’,  ‘Xuegos y tradiciones populares asturianes’ u ‘Ecoloxía y Mediu Ambiente n’Asturies’ y de 30 hores llectives.

El día caberu pa inscribise pa la UABRA ye esti vienres, siendo l’horariu pa formalizar la matrícula na sede de l’ALLA (L’Águila 10, Uviéu)  –pa lo que ye necesario abonar l’importe y llevar una semeya– el siguiente: de llunes a xueves, de 9 a 15 hores y de 16 a 19 hores; y de 9 a 14 hores, los vienres. Por mor de la demanda alta que tienen estos cursos, la institución va siguir un orde rigurosu d’inscripción.