Comienza la UABRA en Cangas del Narcea

|

El conseyeru Genaro Alonso participa na inauguración de los cursos de l'ALLA.

L'actu va celebrase a les 13 hores nel salón d'actos de la Casa Cultura Palaciu d'Omaña cola presencia tamién del vicerrector d’Estensión Universitaria y Proyeición Internacional de la Universidá d’Uviéu, Francisco José Borge; la presidenta de l’Academia de la Llingua Asturiana (ALLA), Ana María Cano; l’alcalde de Cangas del Narcea, José Víctor Rodríguez Fernández; y la direutora de la Universidá Asturiana de Branu (UABRA), Cristina Valdés. Esta edición de la UABRA, la sétima, torna a contar cola collaboración del Conceyu de Cangas del Narcea y de la Universidá d'Uviéu, y acueye mientres 15 díes a un centenar llargu d'alumnos y mestros na Casa-Hogar de la villa.

Dende güei comienza a impartise'l ‘Cursu Elemental de Llingua Asturiana’ y el ‘Cursu Avanzáu de Llingua Asturiana’, amás del ‘Cursu de Gallego-asturiano (segunda fase)’, destináu a maestros de Primaria y Secundaria. Amás, na primer selmana entámense los cursos de ‘Capacitación pa la traducción al asturianu’, a cargu de Marta Mori, y ‘Internet y Educación, un enfoque práuticu’, coordináu por David Melendi, dientro de la estaya de 'Cursos d’Afondamientu Cultural y Llingüísticu’.

Esposición sobre'l prerrománicu

Dientro de les actividaes abiertes d’esta edición de la UABRA, tendrá tamién llugar nesta xornada la inauguración de la esposición 'Relieves. Pormenores del prerrománicu asturianu', na sala d’esposiciones de la Casa de Cultura de la villa canguesa. Ésta va tar abierta al públicu mientres duren los cursos.

 

Contador Estadistiques